"Қизилқум": Беш футболчида шамоллаш аломатлари кузатилган ва изоляцияга олинганди. Ҳозир барчаси жойида

Бугун championat.asia сайтида жамоа аъзоларининг 7 нафарининг тест натижаси маълум қилинмаганлиги ҳақида хабар чоп этилди. Навоий вилоят СЭОМ ходимлари томонидан ўтказилган тест натижаларидан сўнг футболчиларда ушбу касалликка чалиниш аломатлари бор ёки йўқлиги акс эттирилган рўйхат клубга, клуб эса ўз навбатида ПФЛга тақдим этган. Дарҳақиқат ўша рўйхатдан жамоанинг 7 нафар аъзоси жой олмаган. Бу эса табиийки турли тушунмовчиликларни юзага келтирган.

Аввало таъкидлаш жоизки, “Қизилқум” ПФК да фаолият юритувчи 100 дан ортиқ ходимдан тест учун таҳлиллар олишди. Таҳлил натижаларига кўра, рўйхатдан ўрин олган дастлабки 50 нафар ходимнинг жавоблари клубга маълумот учун жўнатилган. Қолган 50 дан ошиқ ишчи-ходимнинг тест таҳлили учун олинган наъмуналар жавоби душанба куни маълум бўлиши кутилмоқда.

Қолаверса, футболчилардан икки нафари – Азизбек Усмонов ва Дониёр Усмонов аввалги тур ўйинларида жароҳат олишган ва айни пайтда улар жароҳатни даволаш билан банд. Воҳид Шодиев, Муҳсин Убайдуллаев, Салим Мустафоев ва икки нафар туркманистонлик футболчи Абди Бешимов ва Везиргелди Ильясовда бироз олдинроқ шамоллаш аломатлари кузатилган ва улар изоляцияга олинганди. Айни пайтда ушбу футболчиларнинг соғлиги билан боғлиқ муаммолар йўқ. Улар жамоа машғулотларида тўлиқ иштирок этишмоқда ва ушбу футболчиларнинг тест таҳлиллари натижаси янги ҳафтада маълум бўлиши кутилмоқда.