Нурилло Тўхтасинов: "Теренггану"ни халқаро майдон туфайли танладим"

Биз Тўхтасинов билан боғланиб, янги клубидаги илк таассуротлари билан қизиқдик.

- "Теренггану"дан биринчи таклиф қачон бўлганди?
- Тахминан 2 ойча олдин Малайзия клубидан қизиқиш борлигини агентим айтганди. Ўйлаб кўрдик ва розилик бердим.

- Сир бўлмаса яна қайси клублардан қизиқиш бўлганди?
- Эроннинг "Тракторсози" ва БААнинг "Ал Иттиход Калба" клубларидан қизиқиш бўлганди.

- Нега айнан "Теренггану"ни танладингиз?
- Сабаби ушбу клуб янги мавсумда ОФК кубогида иштирок этади. Халқаро майдонда ўйнаш иштиёқи ҳамда клуб раҳбариятининг ўз олдига қўйган мақсади туфайли шу клубни танладим.

- Бош мураббий билан гаплашдингизми? У сиздан айнан нима хоҳлаётганини айтдими?
- Ҳа, албатта бош мураббий билан суҳбатлашдим. Мендан ҳужумчиларга кўпроқ ёрдам бериш, ҳамда имкон бўлиши билан дарвоза томон зарбалар беришимни сўради.

- "Теренггану"да ўзбекистонлик ҳимоячи Сардор Қулматов ҳам ўйнамоқда. Сардор клубга мослашишга қанчалик ёрдам бермоқда?
- Тўғрисини айтсам ҳали Малайзияга учиб бормасимдан Сардор ака билан гаплашиб турдим ва турли маслаҳатлар олдим. Клубга мослашишимга катта ёрдам бермоқдалар. Уйларимиз жуда яқин.

- Малайзияда чемпионат тугашига 10та тур қолди. Айни пайтда клуб 6-ўринда экан. Ўтган йил "Теренггану" чемпионатда 2-ўринни олганди. Бу йил қайси ўринни эгалласа муваффақият ҳисобланади?
- Тўғри чемпионатда ишлар у қадар зўр эмас. Лекин ҳали ўйинлар кўп ва имкон қадар юқорироқ ўринлардан бирини эгаллаш учун ҳаракат қиламиз. Энг асосий мақсад ОФК кубогида муносиб натижа қайд этиш.

- Клуб инфратузилмаси (стадион, база) ҳақида нима дея оласиз?
- Ажойиб. Клуб базасида 4 ёки 5та машғулот майдони борлигининг ўзи катта нарса. Бу ерда футболчилар учун барча шароитлар яратилган.

- "Нефтчи" клуби ва унинг мухлисларига нима дейсиз?
- "Нефтчи" клубига, раҳбариятдан тортиб оддий ходимгача раҳмат айтаман. Мухлислар бизни ажойиб тарзда қўллаб туришди, иккинчи даврада ҳам улардан "Нефтчи"ни бундан ҳам кучлироқ қўллаб-қувватлашларини сўрайман. Иккинчи даврада "Нефтчи"га омад тилайман!