Муроджон Зуҳуров: "Ҳакам 11 метрлик нуқтани кўрсатдими, демак, пенальти бўлган"
07 апр 2019 12:15
Новости

Муроджон Зуҳуров: "Ҳакам 11 метрлик нуқтани кўрсатдими, демак, пенальти бўлган"

Суперлига 3-тури доирасидаги “Навбаҳор” – “Бунёдкор” учрашувининг энг яхши футболчиси деб топилган “Бунёдкор” дарвозабони Муроджон Зуҳуров ўйин ҳақидаги фикрларини билдириб, жумладан, шундай деди:

- Ушбу учрашувнинг қийин кечишини билардик. Сабаби, жамоамиз ёш футболчилардан таркиб топган ва тажрибаси камроқ. Биринчи бўлимда яхши ҳаракат қилдик. Иккинчи бўлимда айнан шу тажрибанинг камлиги боис, ўйинимиз қовушмади. Айниқса, жисмоний жиҳатдан озгина чарчаб қолдик. Аммо йигитлар ҳаракат қилишди. Натижада ғалаба қозондик ҳамда мухлислар олдида юзимиз ёруғ бўлди.

Ўйиндаги пенальтилар хусусида тўхталадиган бўлсам, бор нарсани бор дейиш керак. Ҳакам 11 метрлик нуқтани кўрсатдими, демак, пенальти бўлган. Йигитлар бироз концентрацияни йўқотиб қўйишди. Оқибатда кетма-кет тўп ўтказиб юбордик. Юқорида айтганимдек, тажрибасизлик ҳам озгина панд берди.

Иккинчи 11 метрли жарима зарбасини қайтарган вазиятимга келсак, ўша ҳолатда маҳоратимни намойиш этиш ва рақибни чалғитишга ҳаракат қилдим ҳамда бунинг уддасидан чиқдим. Қайтган тўп унинг оёғига бориб тушганида ерда ётгандим, рақиб тўпни дарҳол тепмагани учун ҳимоячиларимиз менга ёрдамлашиб юборди ва тўпни эгаллаб олдим. Ғалабадан хурсандман!