Илёс Зейтуллаев: "Майдонни бундай ажойиб ҳолатга келтирган инсонларга раҳмат. "Қўқон-1912"га қарши учрашувларимиз қизиқарли бўлмоқда"

"Биринчи навбатда майдонни бундай ажойиб ҳолатга келтирган инсонларга раҳмат айтаман. Мен бунчалик яхши майса бўлишини кутмагандим. Бу жуда ёқимли. Майса туфайли икки жамоа ҳам ҳақиқий футбол кўрсатди ёки кўрсатишга ҳаракат қилди. Биринчи бўлимда ёмон кўринмадик, ўйлаган режамиз ўхшаб турганди. "Қўқон-1912" лигада жон сақлаб қолиш учун курашаётгани туфайли жамоа майдонда борини бермоқда. Биз ўтган мавсум шундай вазиятда эдик. "Қўқон-1912" чемпионатни яхши тугатиб олишига тилакдошман. Ўзимизнинг йигитларга эса раҳмат айтаман. Шундай ўйнашда давом этсак, жамоа сифатида яхши ўсамиз", - деди Илёс Зейтуллаев баҳс якунлангач.

- Ўтган турда жамоангиз ОКМКга йирик ҳисобда мағлуб бўлди. Бундай мағлубиятдан сўнг футболчиларни ўзига келтириш ва ўзига бўлган ишончни яна қайта тиклаш қийин бўлмадими?

- Йўқ. Биз йирик ҳисобда ютқаздик, тўғри. Масалан, биз ОКМКга 1:5 ҳисобида ютқаздик. Ундан олдин эса ОКМК "Сўғдиёна"га 1:4 ҳисобида мағлуб бўлган эди. Футболда учраб турадиган ҳолат. Биз ҳисобни тенглаштирганимиздан сўнг ҳисобни ўз фойдамизга ўзгартира оламиз деган фикр пайдо бўлди. Иккинчи голни ўтказиб юборганимиздан кейин эса "blackout" рўй берди десак ҳам бўлади ва футболчилар ўйиндан тушиб қолди. Биз бу ҳақда гаплашиб олдик ва барчаси ортда қолди. Қўрқинчли жойи йўқ, шундай бўлиб туради. Бугун футболчилар ўтган баҳсдаги йирик мағлубият унутиб бўлинганини майдонда исботлашди. Захирадан майдонга тушган футболчилар  Азизбек Тўлқинбеков, Асад Раҳимжонов, Музаффар Олимжонов ва сардоримиз Темурхўжа Абдуҳолиқов майдонда ўз сўзини айтишди.

- Тажрибали ўйинчи Темурхўжа Абдуҳолиқов захирада қолиб кетиши қанчалик тўғри қарор?

- Темурхўжа биз учун жуда муҳим ўйинчи. У сўнгги учрашувларда тўлиқ майдонда ҳаракатланаётган эди. Иситма билан ҳам ўйнаган ўйинлари бўлди. У бироз дам олиши учун, бугун Кривокапични майдонга туширдик. У жароҳатидан фориғ бўлди ва биринчи бўлимда яхши ўйин намойиш этди. Иккинчи бўлимда эса Темурхўжа майдонга тушди ва ўйинимизни кучайтира олди.

- Жорий мавсумда "Бунёдкор" "Қўқон-1912"ни уч учрашувнинг асосий вақтида мағлуб эта олмади. "Қўқон-1912" "Бунёдкор" учун ноқулай рақибми?

- "Қўқон-1912" жуда яхши жамоа, менинг назаримда. Суперлигада кучсиз жамоанинг ўзи йўқ, учрашувдан олдин мураббийлар штаби билан ҳам шу мавзу бўйича гаплашдик. Ўзбекистонлик футболчилар ва легионерлар яхши даражада. "Қўқон-1912" индивидуал жиҳатдан кучли футболчиларга эга. Қўқонга келиб ўз футболини намойиш этиш осон иш эмас. Қўқон бой футбол тарихига эга. Биз майдонда ўзимизнинг ўйинимизни намойиш этишга ҳаракат қилдик, аммо ҳар доим ҳам бу ўхшайвермайди. Шу сабабли жорий мавсумда "Қўқон-1912"га қарши учрашувларимиз қизиқарли бўлмоқда. Масалан, Тошкентдаги учрашув қандай натижа билан якунланганини эсласангиз керак.