Миср дарвозасига супергол урган Ғаниев флешмобни давом эттирди ёхуд Турсуновга "жавоб"

"Бугунги ўйиндан олдин дўстларим, акаларим Достон Турсунов, Одил Ҳамробеков, Жавоҳир Сидиқов гол уришимни айтиб, омад тилашганди. Худога шукур, ниятлари ижобат бўлиб Миср дарвозасига гол уришга муваффақ бўлдим. Шу боисдан бугунги голимни Одил Ҳамробеков, Достон Турсунов ва Жавоҳир Сидиқовга бағишлайман. 

Бугунги ўйин давомида бизларни қўллаб-қувватлаб турган мухлисларга катта раҳмат дейман. Андижондаги стадионда чинакамига чиройли муҳит ҳукмронлик қилди. Айнан уларнинг далдаси мени илҳомлантириб юборди. Келгуси ўйинларда ҳам мухлисларимизни хурсанд қилишга ҳаракат қиламиз", - дея ўйин ҳақидаги фикрларини билдирди Азиз Ғаниев.

Қайд этиш керакки, куни кеча Ўзбекистон терма жамоаси сафида дебют голини КХДР дарвозасига урган Достон Турсунов ҳам сайтимиз орқали голини Ҳамробеков, Ғаниев ва Сидиқовга бағишлаб, ўйиндан аввал айнан улар Достонга гол уриши ҳақида ишонч билдиришганини гапирганди. Энди эса Азиз Ғаниев мазкур ўзига хос флешмобни давом эттирган ҳолда Достон Турсуновга қайсидир маънода жавоб қайтарди. 

Умид қиламизки, бу ёқимли анъана, флешмоб терма жамоаларимиз иштирокидаги ўйинларда ҳали узоқ давом этади.

Эслатиб ўтамиз, бугун Андижонда ўтган ўртоқлик учрашувида Ўзбекистон ҳамда Миср олимпия терма жамоалари ўзаро куч синашишди ва мазкур беллашувда вакилларимиз "Насаф" аъзолари Бобир Абдихолиқов ва Азизжон Ғаниевнинг голлари эвазига ғалаба қозонишди.