“Локомотив” йиғинида сербиялик футболчи

У бугундан эътиборан машғулотларни бошлаб юборди.

Тўлиқ исм-шарифи Ненад Предрагович Иняц бўлган ҳужумчи 1985 йил Белград шаҳрида туғилган. Ўз мамлакати клубларидаги фаолиятидан ташқари 2008 йил Пермнинг “Амкар” клуби шарафини ҳимоя қилган. Ўша вақтлар “Амкар”ни Миодраг Божович бошқариб борарди. Унинг бошчилигида пермликлар Россия чемпионатининг 4-пағонасига қадар кўтарилишган.

Иняц кейинги мавсумдан эътиборан Нижний Новгороднинг “Волга”сида тўп сурган. 2010-2011 йилги мавсумларни Белграднинг “ОФК” клуби сафида ўтказган ҳужумчи, 2011 йилга келиб Осиё қитъасига ташриф буюрди ҳамда Саудия Арабистонининг “Ал-Ансор” жамоаси билан шартнома имзолади. 2013-14 йилги мавсумларда Қозоғистоннинг “Атирау” клубида ўйнади.

Сўнгги икки мавсумни Сербия чемпионатида ўтказган 30 ёшли Ненад Иняцнинг кейинги тақдирига Дубайдаги йиғиндан кейин ойдинлик киритилади. Унинг ҳаракатлари Мирко Еличич бошчилигадаги мураббийлар штабига маъқул келса, “Локомотив” сафида қолиши мумкин. Йўқса, унга жавоб бериб юборилади.

Эслатиб ўтамиз, “Локомотив” йиғинида шунингдек черногориялик ҳужумчи Иван Вукович ҳам бўлиб турибди.