Футзал. Холбек Йўлдошев: “Жамоани сақлаб қолиш учун ҳомий керак”

Клубнинг чемпионатда илк маротаба қатнашганини инобатга оладиган бўлсак, бу жуда яхши кўрсаткич. "Дўстлик-AIN" ҳақида батафсил маълумотга эга бўлиш мақсадида жамоа бош мураббийи Холбек Йўлдошев билан боғландик.

- Дастлаб жамоанинг қандай тузилгани ҳақида маълумот берсангиз?
- Ҳозир Қашқадарёда спортни ривожлантиришга жуда катта эътибор қаратилмоқда. Вилоятда кўплаб сунъий қопламали майдонлар қурилмоқда. Биз ана шу майдонларда тўп тепадиган йигитлардан энг яхшиларини саралаб олиб жамоа тузишга қарор қилдик ва бу жамоанинг номини "Дўстлик" деб номладик. Бундай номлашимизнинг биринчи сабаби, бир неча йиллар аввал олий лигада Тошкент вилоятининг "Дўстлик" жамоаси бўларди, ана шу клуб чемпионатда яхши таасурот қолдирган, ҳатто икки бор мамлакат чемпиони ҳам бўлганди. Шу клубга ҳавас қилиб шундай номлаганмиз. Иккинчи сабаби эса жамоа ўйинчилари ўзаро жуда иноқ, ички муҳит аъло даражада. Шунинг учун ҳам, "Дўстлик" деб қўйганмиз.



Шу тариқа,  жамоа 2013 йилда ташкил этилган. Клуб дастлаб пляж футболи бўйича Ўзбекистон кубогида иштирок этган. Биринчи йилни ўзида кубокни қўлга киритганмиз. Кейин у ердан Тошкентга мини футбол бўйича ҳаваскорлар ўртасидаги ассоциация кубогида қатнашиш учун келдик. Ушбу кубокда муносиб иштирок этиб, фахрли учинчи ўринни эгалладик. Мусобақадан кейин Ўзбекистон футзал федерацияси биринчи вице-президенти Мухтор ака Ҳошимов билан маслаҳатлашиб жамоанинг кучини мини футбол бўйича олий лига бахсларида синаб кўришга қарор қилдик.
Ўзининг дебют мавсумида жамоа жуда кўп қийинчиликларга дуч келганига қарамай иккинчи  поғонани банд этди.

- Клубнинг базаси борми?
- Афсуски, жамоамизнинг энг катта муаммоси базанинг йўқлиги. Ҳатто, ўқув-машғулотлар ўтказиш учун зал ҳам йўқ. Сунъий қопламали майдонларда машғулот ўтказамиз, ўшанда ҳам қайси бири бўш бўлса, ўшанисида ўтказилади машғулот.

Бу муаммоларнинг асосий сабаби ҳомийлар йўқлигида, шу кунгача клубнинг барча ҳаражатларини ўз ҳисобимдан кўтариб келдим. Агар юқори ташкилотлар ёки корхоналар жамоамизга ҳомийлик қилсалар кейинги йил чемпион бўлишга ҳаракат қилган бўлардик. Бу йил кубокда ҳам, чемпионатда ҳам финалга чиқдик. Лекин, ана шу икки финал ўйинидан олдин йигитларда рухий жиҳатдан синиш кузатилди. Бунинг асосий сабаби эса вилоятда финалга чиққанимиз билан табриклаб, бизга руҳий далда бўладиган инсон топилмади. Ҳеч ким ҳатто эсламади ҳам. Бу эса бутун мавсум тер тўкиб дебют мавсумидаёқ ҳал қилувчи паллагача етиб кела олган ўйинчиларни руҳан синдириб қўйгандек бўлди.



Баъзида шунча қилинган мехнатга ачиниб кетаман. Финалдаги учрашувларда қўлдан келганча ҳаракат қилдик, лекин бироз кучимиз етмади. Кумуш медаллар ҳам ёмон натижа эмас, қанча жамоалар кумуш медални орзу қилишади. Мана кумуш медаллар билан Қашқадарёга қайтганимизга анча бўлди. Афсуски, ҳалигача бирон киши на табрикламади, на рахмат айтмади.

Жамоанинг тарқалиб кетишини истамайман, шунинг учун ҳам ҳомийлик қилиш истагини билдирадиган ташкилот топилади деб умид қиламан.

- Миллий терма жамоага кимлар чақирилди?
- Миллий терма жамоага дарвозабонимиз Акмал Хазратқулов ва ҳужумчи Алишер Ибрагимовлар чақирилишган. Бугунги кунда улар терма жамоа билан Тошкентда йиғин ўтказишмоқда.

Бу йилги чемпионатда энг яхши мураббий номинациясида ғолиб бўлсам керак деб ўйлагандим. Ҳар ҳолда биринчи йилни ўзидаёқ ҳам кубокда, ҳам чемпионатда финалга қадар етиб келдик. Лекин, энг муҳими кўрсатган натижаларимиздан кўнглим тўлди.

- Ўйинчиларингизга бошқа жамоалардан таклифлар борми?
- Албатта. Дарвозабон Акмал Хазратқулов, ҳимоячи Жасур Ўрунов ҳамда ҳужумчи Алишер Ибрагимовларга бошқа жамоалардан таклифлар тушмоқда.


Толибжон Қосимов суҳбатлашди