Дилшод Раҳматов: "Жамоадошларимнинг амалдаги Жаҳон чемпионларига қарши кўрсатган ўйини хурсанд қилди"

"Аввало мухлислар ҳақида тўхталиб ўтмоқчиман. Шунчалик қўллаб-қувватлашгани учун раҳмат. Ушбу учрашувни ташкил қилганларга ҳам миннатдорчилик билдираман. Бугунги рақибимиз амалдаги Жаҳон чемпиони ҳисобланарди. Балки, бугун улар ўзининг ўйинини идеал даражада кўрсата олмагандир. Лекин, бизнинг йигитларнинг ўйин давомида кўзи ёниб турди. Жамоадошларимнинг шундай рақиб билан тенгма-тенг ўйнагани хурсанд қилди. Бугун Аргентина юқори савияда ўйнай олмади ёки бизнинг терма жамоа кучли ҳаракат қилди. Эртанги баҳсдан сўнг бирор хулоса чиқариш мумкин. 

Камчиликларимизни мураббийларимиз ҳам танаффусда айтиб ўтишди. Рақиб футзалчилари ўйинни яхши кўра олишар экан. Улар сафидан бирорта ўйинчини ажратиб кўрсата олмайман. Жамоавий ўйин яхши шаклланган. Фақатгина, маҳорат борасида устунлиги кўриниб турибди. Биз ўз ўйинимиз билан  Жаҳон чемпионатидаги ўрнимизни кўрсатмоқчимиз. Мазкур учрашувни фақат Ўзбекистонда эмас бошқа мамлакатларда ҳам кўришди. Ўйлайманки, Аргентина билан ўйин мундиал сари ташланган яна бир қадам бўлди", - дейди Раҳматов.