Даврон Файзиев: "Мураббийлик борасидаги бор билимим ва тажрибамни ишга солаяпман "

Ўйин ҳақида

- Бирон гап айтишим қийин, чунки асабий холатдаман. Қизиқарли ва шиддатли ўйин бўлди. Фақат гол йўқ. Тан олиш керак, охирги 10 дақиқаликда АГМК жамоаси захира футболчилари эвазига устунликка эга бўлишди. Биз астойдил ҳаракат қилаяпмиз. Ҳозирда жамоамиз учун ҳар бир очко олтинга тенг бўлиб бормоқда. Мураббий сифатида бор билимим, бор тажрибамни ишга солаяпман. Бу бизнинг қаторасига 7-дуранг натижамиз ҳисобланади. Бунча дурангдан 4 та ғалаба яхшироқ эди. Бу футбол ва унда ҳар қандай холатга тайёр туриш керак. Бугун Йосович ва Тошмирзаевлар карточкалар туфайли ўйинни ўтказиб юборишди. Захирамиз ҳам кучли эмас эди. Ҳар қандай жамоага қарши ўйнаш мумкинлигини бугун йигитлар кўрсатиб беришди. Вазиятларимиз рақибдан кўпроқ бўлди. Гол урмаганимиз учун дуранг адолатли натижа бўлди деб ҳисоблайман.

- Йосович, Мерзяков, Ҳожимирзаев ва Тошмирзаевлар сафга қайтса, жамоа ҳозирги қийин вазиятдан чиқиб кетиши мумкинми?

- Мерзляков 10 кундан буён машғулотларга киришди. Аммо, ҳали тўлиқ тайёр эмас. Тошмирзаев ва Йосовичларда жароҳат йўқ, улар карточкалар туфайли ўйинни ўтказиб юборишди. Ҳожимирзаев жароҳатдан 2 та турдан сўнг қайтади. Комилов ва Норматовлар шу каби ўйинларда ўсишга эришади.

- Андрей Сидоровни сал аввалроқ майдонга тушириш мумкинмиди?

- АГМКга қарши ўйинда бир ҳимоячини олиб ҳужумчини тушириш жуда катта таваккал бўларди. АГМК 4-3-3 схемада ўйнади. Гол урсак, ютиб кетишимиз ҳам мумкин эди. Ҳозир турнир жадвалида хавфли ўринда турибмиз, йигитларга ишонман, биз бу вазиятдан чиқиб кетамиз. "Бўридан қўрққан ўрмонга бормайди", биз охиригача курашамиз.

- Азизхон Эркинов бугун Суперлигада дебют қилди. У кўрсатган ўйин ҳақида фикрингиз?

- Азизни майдонга олиб Жавоҳирни туширдим. Барибир сезилди, унда ҳаяжон бор эди. Сардор Етовқўзиевда ҳам шунақа холат. Бизда иқтидорли ёшлар бор.

- Жамоангиз футболчилари кўп холатларда ўйиндан ташқари холатларда қолиб кетишди...

- Мени талабим ҳужумчилар олдинги чизиқда тўп сўрашлари керак. Бунда футболчи вазиятни ҳам баҳолаши керак бўлади. Ўйиндан ташқари холатда эмасми, ёки тўпни ололмай қолса қарши ҳужум хавфи юзага келиб қолмайдими, мана шуларга эътибор қаратиши лозим. Лекин бугунги рақибимиз сафида тажрибали футболчилар бор эди, бунақа ўйинлар осон бўлмайди.