Чемпионатларимизнинг 25 йиллик умумий жадвали ҳақида

Бундан ташқари 2016 йилда клубларимиз қайд этган эътиборли натижалар ҳақида тўхталамиз.

25 йиллик жадвални 11 карра чемпион “Пахтакор” бошқариб бормоқда. 740та ўйинда 1630 очко жамғарган “шерлар” энг кўп ғалабага эришган (504та) ва энг кўп гол урган жамоа (1678та) бўлиб туришибди. Клуб 23-турда “Навбаҳор”га қарши баҳсда 500-ғалабасини қўлга киритди. Ўзбекистон тарихида қолган ҳеч бир жамоа 500та ғалабага эришмаган. Кейинги йил жамоа 800-ўйинни ўтказади, бундан ташқари 1700-голни уриши ва 650-голни ўтказиши мумкин.

Рўйхатда иккинчи поғонада бораётган Фарғонанинг “Нефтчи” клуби “Пахтакор”дан 138 очкога ортда қолмоқда. Жамоа 7-турда “Шўртан” билан 2:2 ҳисобида дуранг ўйнаганди. Ўша ўйинда Аббос Махсталиев томонидан урилган гол клуб учун 1500-гол бўлиб тарихда қолди. Фарғоналиклар 2017 йил 8 очко олишса ўз очколарини 1500тага етказиб олишади. 

Олий лигадан тушиб кетишига оз қолган “Навбаҳор” клуби умумий рўйхатда 3-ўринда. 9-турда “Қўқон-1912”га қарши ўйиндаги ғалаба “лочинлар”нинг 350-ғалабаси бўлди. “Лочинлар” бу мавсумда 900-голни ўтказиб юборишди. Жамоа 2017 йилда очколарини 1200тага етказиб олиши деярли аниқ.

10 карра бронза медаль соҳиби Қаршининг “Насаф” клуби умумий жадвалда 4-ўринда бормоқда. Қарши клуби бу мавсум сўнгги турда "Машъал"ни мағлуб этиб ўз очколарини 1100тадан ошириб олди. Қарши клуби агар 2017 йилда 31та гол урса умумий голлари сонини 1100тага етказиб олиши мумкин. "Аждарлар" кейинги мавсум 600-ўйинни ўтказишади.

Бу йилги мавсумда “Бухоро” клубининг 1000-голи урилди. 30-турда “Шўртан” билан ўйинда Шавкат Саломов томонидан урилган гол клуб учун юбилей голга айланди. "Бухоро" янги мавсумда 11та ғалабани қўлга киритса ғалабалар сони 300тага етади, 20 очкодан сўнг 1000-очко қўлга киритилади.

Олий лигани тарк этган “Андижон” жамоаси бу йил ўз очколарини 800тадан ошириб олди. "Бургутлар" олий лигага қайтишганидан кейин 700-ўйинни ўтказишади ва 950-голни уришга уриниб кўришади.

Жиззахнинг “Сўғдиёна” клуби ўзининг юбилей 600-учрашувни ўтказди. 15-турда "Қизилқум" билан баҳсда жамоа 100-дурангни қайд этди. 8-турда "Шўртан"дан қабул қилинган мағлубият "Сўғдиёна"нинг олий лига тарихидаги 300-мағлубияти бўлди. 9-турда "Олмалиқ" билан ўйинда рақиб посбони Умид Хонимқулов томонидан урилган автогол гол жамоанинг юбилей 800-голи бўлди. 

2016 йил “Металлург”нинг 550-учрашуви кузатилди ва 25 йиллик умумий рўйхатда икки поғонада юқорилаб 9-ўринга чиқиб олди. Яна учта голдан сўнг бекободликларнинг юбилей 700-голи урилади.  

“Қизилқум” бу йил ўз очколарини 650тадан ошириб олди. 4-турда “Обод” билан баҳсда Илҳом Юнусов томонидан урилган гол клубнинг 600-голи бўлиб тарихга кирди. 2017 йилда “Қизилқум” 500-ўйинни ўтказади, бундан ташқари 200-ғалабани қўлга киритиши, 100-дурангини қайд этиши мумкин.  

“Бунёдкор” клуби бу йил олий лигадаги 10-мавсумини ўтказди ва очколарини 650тадан ошириб олди. 2016 йилда клуб ўзининг 200-ғалабасига эришди. Бу юбилей 20-турда “Олмалиқ” билан баҳсда қайд этилди. Бундан ташқари дуранлар сони 50тага етди. Янги йилда “қалдирғочлар” 300-учрашувда майдонга тушишади.

“Машъал” клуби бу йил олий лигадаги 450-учрашувни ўтказди. Кейинги йил жамоа ғалабаларини 200тага етказиб олиши ва 600-голини уриши мумкин.

Илк бор Ўзбекистони чемпиони бўлган “Локомотив” бу йил ўз очколарини 550тадан ошириб олди. 13-турдан ўрин олган "Қизилқум" билан баҳсда Темурхўжа Абдухолиқов томонидан урилган гол "темирйўлчилар" учун олий лигадаги юбилей 500-гол бўлди. Кейинги йил жамоа 600-голини уриши ва очколарини 600тадан ошириши мумкин.

“Қўқон-1912” бу йил очколари сонини 400тадан ошириб олди.  20-турда "Насаф" билан ўйинда Сухроб Бердиев томонидан урилган гол жамоанинг олий лигадаги юбилей 450-голи бўлиб тарихда қолди. Кейинги йил клубнинг дуранглари сони 50тага етиши мумкин.

Бу йил “Шўртан”нинг ўйинлари сони 300дан, очколари сони эса 350дан ошди. Ғулом Раҳмонов 18-турда “Металлург” билан ўйинда жамоанинг олий лигадаги умумий голларини 350тага етказди. Якунланган мавсумда Ғузор клуби дарвозасига 500-гол урилди. 25-турда "Андижон" устидан қўлга киритилган ғалаба жамоанинг юбилей 100-ғалабаси бўлди.

“Олмалиқ” клуби 30-турда “Қўқон-1912” билан баҳсда 250-учрашувни ўтказди. 21-турда “Навбаҳор” билан ўйинда Муҳаммад Исаев “Олмалиқ”нинг юбилей 350-голини урди. Бу йил жамоа дарвозасидан 350-гол ўрин олди. 27-турда "Андижон" билан баҳсда юбилей 50-дуранг кузатилди. Бундан ташқари клубнинг очколари сони 300дан ошди. Кейинги йил жамооа 100-ғалабасига эришиши, 400-голни ўтказиши ва очколарини 350тага етказиб олиши мумкин.

Олий лигада илк бор иштирок этган Тошкентнинг "Обод" клубининг элитадаги биринчи голини 4-турда "Қизилқум" билан ўйинда Павел Соломин уришга муваффақ бўлди. Жамоа дебют мавсумда 25та гол урди. "Шўртан" билан ўйинда "Обод" дарвозасига 50-гол урилди. Кейинги йил клуб 10-ғалабасини қўлга киритиши, 10-дурангини қайд этиши, 50-голини уриши ва очколари сонини 50тага етказиб олиши мумкин.

Нарзулла Сайдуллаев тайёрлади