"Бухоро" ёрдамчи мураббийи: "Ҳакам нега футболчиларимизни сўкади? Ҳакамнинг "Нефтчи"га ёрдам бериши шарт эмасди"

- Иккала жамоа ҳам футбол ўйнашга ҳаракат қилди. "Нефтчи"нинг таркибида юқори маҳоратга эга, термани жаҳон чемпионатига олиб чиққан футболчилар бор. Шу сабабли уларнинг футбол ўйнашига бошқаларнинг ёрдам бериши шарт эмас. Ҳа, жамоа футбол ўйнади, бироқ бизнинг футбол ўйнашимизга ҳалақит қилишди ва бу ишни ким қилганини яхшигина кўрдик. Эпизодлар ҳар хил талқин қилинди, карточкаларнинг кўрсатилиши ҳам бир-бирига тўғри келмади. Иккала томонга бир хил вазият бошқача талқин қилинди.

Бир нарсани тушунмайман, Ўзбекистонга келганимда одамларнинг жуда мулойим ва ҳушчақчақлигини кўрганман, лекин ҳакам нега майдонда футболчиларни ҳақоратлайди? Тушуна олмаяпман. Ҳа, хато қил, ҳа, ҳуштак чал, лекин сўкиниш нега? Спортчиларни, футболчиларни ҳурмат қилиш керак. Бу ўзбек футболига ёрдам бермайди. Футболчилар ҳар қандай оғир шароитда ҳам футбол ўйнаши керак, лекин уларга ёрдам бериш унчалик шарт эмас. Қачонки улар "зона комфорта"га тушиб қолса, ўсишдан тўхтаб қолишади. Бу менинг шаҳсий фикрим. Миллий терма жамоада ишласам ҳам шу гапни айтган бўлардим. Бундай тартибсизлик ва хунук ҳолатни қабул қилиб бўлмайди. 

- "Бухоро" жамоасининг шикояти бор экан, клуб буни протоколга киритадими? Ёки бу гаплар учун жарима тўлайдими?

- Бу билан клубдагилар шуғулланади. Бу мураббийлар штабининг иши эмас. 

- Шоҳруз Норхоновнинг захирада қолиб кетаётганига сабаб нима?

- Спорт принципи. Биринчидан, бизда футболчилар амал қилиш керак бўлган маълум қоидалар бор. Иккинчидан, биз уни иккинчи бўлимдаги тезлиги орқали жамоа ўйинини кучайтиришини истагандик. 

- "Бухоро" ушбу мавсумда сўнгги дақиқаларда кўп гол ўтказиб юбормоқда. Бу нима билан боғлиқ?

- Эътиборни йўқотиш. Футболчиларга эътирозим йўқ, қаердадир ишлар ўхшади, қаердадир йўқ. Ундан ташқари, биздаги ёш футболчилар турли ёшдаги термаларга чақирилмоқда. Барчаси тажрибага бориб тақалади, вақт ўтиб бу ҳам келади, кейин натижа ҳам бўлади. 

- Таркибингиздаги фарғоналик футболчи Асилбек Қайюмов ҳақида қандай фикрдасиз?

- Бу ҳақда гапириш нотўғри бўлади деб ўйлайман. У ҳали жуда ёш, ҳаракат қилмоқда. Бироқ ундан кўпроғини талаб қилган бўлардик.