Бугун футбол. "Персеполис" - "Ал Садд"
23 окт 2018 11:26
Новости

Бугун футбол. "Персеполис" - "Ал Садд"

Бугун Осиё чемпионлар лигасининг 1/2 финалидан ўрин олган жавоб баҳси ўтказилади.

Теҳрондаги машҳур "Озоди" стадионида Эроннинг амалдаги чемпиони "Персеполис" Қатарнинг "Ал Садд" клубини қабул қилади. Ўйин бизнинг вақт билан 20:00да бошланади. "Спорт" телеканали мазкур учрашувни бугунги дастурига киритган, бироқ тўғридан-тўғри эмас, балки 22:00дан бошлаб эфирга узатиши ёзиб қўйилган.

Доҳада кечган биринчи беллашувда "Персеполис" 1:0 ҳисобида зафар қучган. Ўйин охирларида жамоа ҳужумчиси Али Алипур томонидан киритилган гол меҳмонларга кичик ғалабани тақдим этганди. Бугунги ўйиндан сўнг финалга чиққан омадли жамоа номи маълум бўлади. "Персеполис" чорак финалда Қатарнинг яна бир номдор клуби "Ал Дуҳайл"ни ортда қолдирди. "Ал Садд" эса аксинча Эроннинг энг номдор жамоаси "Истиқлол"ни мусобақадан чиқариб юборди.

Маълумот учун, "Ал Садд" 2011 йил ОЧЛда ғолибликни қўлга киритганди. Ҳозирда бу жамоага Жезуалду Феррейра мураббийлик қилмоқда. "Персеполис" устози эса Бранко Иванкович ҳисобланади.