Анвар Бердиев: "Бухоро"га туғилиб ўсган жойимга яқинроқ бўлиш учун бормоқдаман"

Сайтимиз мухбири мураббий билан боғланиб мазкур масалага ойдинлик киритган, "Бухоро" клубига ўтаётгани ҳақида Бердиев томонидан тасдиқланганди. Билишимизча, Анвар Бердиев "Бухоро" бош мураббий сифатида эмас, балки жамоанинг бош мураббийи Даврон Файзиевга яқиндан ёрдам бериш учун бормоқда. Қуйида мураббий билан ташкил этилган суҳбатни эътиборингизга ҳавола этамиз.

- Анвар ака, бизга етиб келган маълумотларга кўра, эндиликда "Бухоро" жамоасида фаолият юритар экансиз, бу ростми?

- Ҳа, тўғри. "Бухоро" клубидан менга таклиф бўлди ва узоқ вақт ўйлаб кўрган холда ушбу таклифни қабул қилдим.

- Айтингчи, "Истиқлол"дан кетиб "Бухоро"га ўтишингизнинг сабаби нима?

- Тўғрисини айтганда, "Бухоро" жамоасидан тушган таклифни туғилиб ўсган юртимга яқинроқ бўлиш учун қабул қилдим. Бу борада оилам билан маслаҳатлашиб шу қарорга келдик.

- "Бухоро" клубига бош мураббий сифатида бораяпсизми?

- Йўқ, бу жамоага ёрдамчи мураббий сифатида кетаяпман. Айни дамда жамоа бош мураббийи Даврон Файзиев ҳисобланади. У инсонни яхши биламан, бир-биримизни яхши тушунамиз. Биргаликда ишлаб насиб бўлса янги мавсум якунида "Бухоро"ни Суперлигага қайтармоқчимиз.

Бекзод Толибов ёзиб олди