Сўнгги уч йилда учта раҳбарни ўзгартирган "Нефтчи" нима қилиши керак?

"Нефтчи"нинг совриндорлар қаторидан йўқ бўлиши аввало фарғоналиклар, кейин водий аҳли учун катта йўқотиш бўлди. Бундан олий лига ҳам кўп нарсани йўқотди. Ҳар ҳолда битта кучли жамоанинг кўринмай кетиши чемпионат савиясига соя солмай қолмади.

Ҳаммаси 2013 йилнинг 8-туридан бошланди. Ўз майдонида "Гулистон"ни мағлубиятга учратган Юрий Саркисян ўз вазифасидан озод этилди. Унга қадар Юрий Вазгенович клубда ҳам мураббий, ҳам бошқарувчи вазифасини бажарарди. Бизга мана энди кириб келган менежер тушунчаси 90-йилларда Саркисян томонидан амалда қўлланиб келинарди. 2013 йил сўнггида "Нефтчи" турнир жадвалини 9-ўринда тугатди. Бу уларнинг тарихидаги энг ёмон иккинчи натижа бўлди. 2010 йил жамоа 10-ўринда чемпионатни якунлаганди. 

Келинг, аввал таҳлил қилиб чиқамиз, нима учун "Нефтчи" ортга кета бошлади?

Аввало Тошкентда "Пахтакор"дан кейин яна битта кучли жамоа пайдо бўлди: "Бунёдкор". Юлдузлар "Бунёдкор"га, келажаги порлоқлар эса "Пахтакор"га кела бошлашди. Ўз-ўзидан "Нефтчи" учинчи поғонага тушди. Кўп ўтмай "Насаф" деган стабил жамоа юзага келди. "Бунёдкор" ва "Насаф" раҳбарияти бор эътиборни клубнинг инфратузилмасига қаратишди. "Нефтчи"да эса ҳеч нима ўзгармай қолаверди. "Пахтакор", "Насаф" ва "Бунёдкор" жамоалари асосий эътиборни болалар футболига қарата бошлаганларидан кейин селекционерлар водийлик истеъдодли футболчиларни пойтахт ва воҳага тортиб кета бошладилар. Фарзандини "Нефтчи" сафида кўришни истаган, аммо нияти амалга ошмаган ота-оналар кейинчалик фарзандларини Тошкент ва Қаршига олиб боришни маъқул кўрдилар. Бу эса "Нефтчи"нинг эртанги кунига ўз таъсирини ўтказди. Натижада "Нефтчи"нинг асосий таркибидан янги Саидов, Акрамов, Холматов ва Фёдоров каби футболчиларни кўрмай қолдик. Саркисяннинг иш услуби эскирган эди, лекин бу уни кўчага чиқариб қўйиш лозим дегани эмасди. Йохан Кройфф каби уни "Нефтчи"да фахрий президент сифатида олиб қолган ҳолда, клуб структурасини ривожлантиришни асосий вазифа этиб қўйиш керак эди. Афсуски, ундай бўлмади.

Саркисяндан кейин клуб Комилжон Мирзабоевга ўтди. Клубнинг иши ўнгланмади. Аксига олиб ички муаммолар туфайли бу мутахассис ҳам ўз лавозимидан кетди ва унинг ўрнига Тоҳир Кападзе иш бошлади. Кападзелар сулоласининг энг каттаси ҳам "Нефтчи"да узоқ қолмади. Кеча унинг ўрнига Фарғона ФФ Вице-президенти Салим Зокиров клубда фаолият бошлади. 

Четдан туриб шу нарсани кузатдик-ки, "Нефтчи"да ким ишламасин, кўплаб "ёзди-ёзди"ларни кўрдик. Бу эса клубда парокандаликка сабаб бўлди. Клуб ичида бўлиниш пайдо бўлди. Айнан шу нарса "Нефтчи"ни орқага тортиб кетди. Саркисяндан кейин "Нефтчи"да Евгений Шохин, Амет Мемет, Мурод Исмоилов ишладилар. Бугун Андрей Фёдоров жамоанинг натижасига жавобгар. Исмоилов ўзимизники бўлгани учун вице-президентларга ўз гапини ўтказа олмади ва натижада ўзи жабр кўрди. Доим ҳам ўзи истаган таркибни йиға олмади, ёшлар билан ишлай деса раҳбарият натижа талаб қилди. Бу эса НОТЎҒРИ! Андрей Фёдоровга жамоа ўтгач, унинг олдидан натижа олиб ташланди ва клуб эркин шакллана бошлади ва бунинг натижасини бугун кўряпмиз. "Нефтчи" ОЧЛ учун кураша бошлади. Лекин сўнгги йилларда йўл қўйилган хатолар охир-оқибат сўнгги турларга келиб панд бера бошлаган кўринади, клуб ўз майдонида "Андижон"га имкониятни бой берди. Бу эса Тоҳир Кападзе учун қимматга тушди ва у киши ўз лавозимидан озод этилди. 

Шу кунгача "Нефтчи"дек бой тарихга эга жамоа бошқа клублардан футболчини иажарага олишни ўзи учун ор деб биларди. Бугун эса жамоа таркибида бир нечта ижарага келган футболчилар жой олганлар. Бу эса сўнгги йилларда жамоада болалар футболига бўлган эътиборнинг кескин тушиб кетганидан далолат беряпти.

2013-15 йил давомида клуб учинчи раҳбар қўл остига ўтди. 90-йилларда "Пахтакор"нинг болалар футболидаги энг катта рақобатчиси "Нефтчи" бўларди. Клуб қачон қандай мусобақада бўлмасин, фақат чемпионлик учун майдонга чиқарди. Ўйинларни Саркисяннинг ўзи бевосита майдонда кузатар ва ўзига манзур келган футболчиларни аввалига ўринбосарлар, кейин эса асосий таркибда синаб оларди. Афсуски, кейинги йилларда "Нефтчи" қарамоғидаги ўсмирлар бирорта Республика миқёсидаги мусобақада кўринмай қолдилар. Хориждаги турнирлар ҳақида-ку, айтмасак ҳам бўлаверади. "Бунёдкор", "Пахтакор" ва "Локомотив" жамоалари бир йилда ҳеч бўлмаганда 3та хорижий турнирда иштирок этиб қайтадилар. Айнан шунинг учун ҳам бу жамоалар етакчилар қаторидан жой оляптилар. Доим ҳам футболда ҳакам ёки биронта ҳолат натижага таъсир қилмайди. Болалар футболига эътибор бериш орқали клуб ўзининг эртанги кунини иқтисод қилиш билан бирга мухлислар кутган натижани беради.

Мақола орқали аввалги раҳбарни танқид қилиб, бугунги раҳбариятга ёқиш ниятимиз йўқ. Мақсадимиз ўзгача, "Нефтчи"ни кучлилар сафига қайтишини истасангиз, Фарғонага болалар футболини қайтаринг. Бунинг учун ҳоким олдига кириб, фалонча пул берсангиз, фалон натижага эришамиз дейиш керак эмас. Истайсизми-йўқми, тизим ва структура бўйича камида 4та жамоа "Нефтчи"дан анча илгарилаб кетган. Майли яна 3-4 йил "Нефтчи" ўртамиёна жамоа бўлсин, лекин клуб бюджетидаги пулни болаларга ҳам бериш орқали ҳақиқий "Нефтчи"ни қайтариш пайти келди. Бугун пойтахт ва воҳалик скаутлар тинч ўтираётганлари йўқ. Қаерда яхши бола чиқса биринчилардан бўлиб ўз жамоаларига олишга ҳаракат қиляптилар. Ҳатто шундай воқеалар бўляптики, "Нефтчи" мураббийларига кўрсатишдан наф йўқ деган Фарғонадаги ёшлар мураббийлари ўз шогирдларини Тошкент ва воҳа жамоаларига кўрсатишяпти. Мақсад пул ишлаш эмас, бизда ёш боланинг трансферига нари борса 10та тўп беришади. Мақсад бошқа, устоз ўз шогирдидаги истеъдод сўниб қолмасин дейди. 

Агар Салим Зокиров ҳақиқатдан ҳам "Нефтчи"нинг аввалги мавқеини тиклашни истаса, бугунданоқ болалар футболи учун махсус дастур ишлаб чиқсин. Керак бўлса Фёдоровдан фойдаланган ҳолда ўз мураббийларини чет элларда ўқитсин, тажриба алмашиб қайтсинлар, нафақат мураббийлар, бошқа бўлим вакилларига ҳам профессионал ишлашни ўргатадиган пайт келди.

Нодирхўжа Юлдашев.