“Қизилқум” “Ҳоким кубоги” турнирини дуранг билан бошлади

Қуръага кўра, мусобақанинг “В” гуруҳида қатнашаётган навоийликлар дастлабки турда Қувасойнинг “Цементчи” футболчиларига қарши майдонга тушди. Ёмғир аралаш ёққан қор остида кечган мазкур баҳс “Истиқлол” стадиони қошидаги сунъий майдонда ўтказилди.

Ўйин кончиларнинг тўлиқ устунлигида ўтган бўлса-да, аммо ҳар икки жамоа аъзолари ўз дарвозалари дахлсизлигини сақлаб қолдилар. Ўйиннинг иккинчи бўлими айниқса шиддатли кечди. Унда “Қизилқум” вакиллари бир неча бор голли вазиятларни юзага келтиришди. Жумладан, Вячеслав Шевченко, Баҳриддин Ваҳобовларнинг рақиб дарвозасига йўллаган зарбалари йўлига бир неча бор дарвоза устуни ва тўсини тўғаноқ бўлди.

Мазкур ўйинда “Қизилқум” таркибида ўтган мавсумни “Бухоро” жамоасида ўтказган Отабек Нарзуллаев майдонга тушди. Агар бу футболчининг хатти-ҳаракатлари мураббийларга маъқул келса, янги мавсум олдидан Отабек билан шартнома имзоланади.

Шунингдек, бугун жамоа машғулотларига тажрибали ярим ҳимоячи Руслан Вагапов (“Металлург”) келиб қўшилиши кутилмоқда.

Ҳакамлар ҳужжатидан кўчирма:

Ҳоким кубоги

“В” гуруҳи, 1-тур.

29 январь

“Қизилқум” (Навоий) — “Цементчи” (Қувасой) — 0:0.

Бош ҳакам: Равшан Копадзе

“ҚИЗИЛҚУМ”:  Артём Макосин, Алишер Юсупов, Георгий Квесиешвили, Файзулла Қамбаров, Акмал Рустамов, Самандар Шодмонов, Илҳом Юнусов, Ғайрат Жумаев, Шерали Жўраев, Вячеслав Шевченко, Баҳриддин Ваҳобов.

Захирадан майдонга тушганлар: Андрей Деркач, Отабек Нарзуллаев, Алишер Холиқов.

“ЦЕМЕНТЧИ”: Элдор Исабоев, Жамшид Қобулов, Оқил Маҳмудов, Абдухолиқ Қурбонов, Жўрабек Ёқубов, Элиёр Мамасолиев, Сардор Сотиболдиев, Алишер Файзуллаев, Азиз Маткаримов, Муҳаммадсултон Фозилов, Элиёр Акбаров.

Захирадан майдонга тушганлар: Фаррух Турдиалиев, Раҳматулло Мелибоев, Исроил Турсунов, Баҳодир Қодиров, Давлат Ёрбеков, Ризо Айвазов, Жасур Абдураҳмонов.

Эслатиб ўтамиз, “Қизилқум” жамоаси навбатдаги учрашувни 30 январь куни ўтказади. Шу куни “Нефтчи-2” футболчилари навоийликлар рақиби бўлади. Ўйин соат 15.30 да Қиргулидаги “Нефтчи” СК стадионида бошланади.