Қаҳрамондан сотқинга айланган футболчилар тарихи

Бугун сиз билан шу каби жанжалларга ва кўплаб мухлислар асабийлашишига сабаб бўлган трансферлар ҳақида гаплашамиз.

Ким: Мануэль Нойер
Қаердан: “Шальке”
Қаерга: “Бавария”
Сабаб: кучлироқ клубга ўтиш истаги
Қачон: 2011 йил
Мануэль Нойер “Бавария”га ўтиб кетиши Бундеслига тарихидаги энг катта хиёнат бўлган. Шу қадарки, Марио Гетце ва Роберт Левандовски Германия терма жамоаси дарвозабонининг трансферини бир чеккада туриб, жимгина муҳокама қилишганди. Хўш, шунча нафратнинг сабаби нимада?

“Бавария” ва “Шальке”нинг бир-бирига ҳеч қандай шахсий адовати йўқ эди. Улар бир шаҳарнинг икки клуби эмас, лекин қолганлар Мюнхен клубини Бундеслигада тарихидаги энг худбин жамоа деб ҳисоблайдилар. Етмаганига, Мюнхенликлар “Шальке”нинг энг иқтидорли тарбияланувчисига “кўз олайтирди”. Интернетда 90-йилларда 4 ёшли Мануель Нойер “Шальке” шаънини ҳимоя қилиб, майдонда югуриб юрганини кўришингиз мумкин. 25 ёшида эса Нойер “Шальке”дан кетиши ҳақида интервью берди ва гельзенкирхенликлар қаҳрамони бир зумда она шаҳрининг асосий душманига айланиб қолди.  

2011 йил баҳорда Мюнхенга келишидан аввал, Нойер бир мухлисдан тарсаки еганди. “Бавария”даги вазият ундан яхшироқ эмасди: Мюнхен мухлислари Мануэльни “совуқ” қарши олишганди. Чунки улар Томас Крафтнинг ўрнини “Шальке”нинг футболчиси эгаллашини қабул қила олмагандилар.      

Энди эса “Бавария”ни Нойернинг ишончли ўйинисиз тасаввур қилиш қийин. Аммо ўйинчини ҳозир ҳам “Фельтинс-Арена”да ҳуштакбозлик билан кутиб олишади. “Тўп менда бўлганида, мухлислар ҳуштак чалишган пайтлар ҳам бўлади. Бироқ, “Бавария”даги фаолиятимга назар ташласангиз, тўғри қарор қабул қилганимга ўзингиз ҳам ишонч ҳосил қиласиз”, — дейди Ману.

Ким: Фернандо Торрес
Қаердан: “Ливерпуль”
Қаерга: “Челси”
Сабаб: кучлироқ клубга ўтиш истаги
Қачон: 2011 йил
Фернандо ўсмир пайтидаёқ ўзини танита олганди. У 19 ёшидаёқ “Атлетико” тарихидаги энг ёш сардор бўлган. Мадрид клуби сафидаги 12 йилдан сўнг Эль Ниньо, ўз олдига жиддийроқ вазифалар қўядиган клубга ўтиш ҳақида ўйлаб қолган ва бир нечта таклифлар орасидан “Ливерпуль”ни танлаган. Фернандонинг энг ёрқин хотиралари ҳамон “қизиллар” таркибидаги ўйинлари билан боғлиқ десак адашмаймиз.

Лекин 3,5 йил давомида Торрес “қизиллар” билан ҳеч қандай мукофот юта олгани йўқ. Фернандо Чемпионлар Лигасида ғалаба қозонишни орзу қилган ва таркибни кучайтиришларини сўраган. ЖЧ-2010дан сўнг, “қизиллар” икки етакчиси Алонсо ва Маскеранони сотиб юборди. Торрес эса жамоа келганидан бери илк бор бошқа клубга ўтиши ҳақида шаъма қила бошлади. Жароҳатлар ва тинимсиз инжиқликлар 2011 йил январь ойида “Ливерпуль”нинг америкалик раҳбарлари таслим бўлишига сабаб бўлди. У рекорд сумма -  53 миллион фунт эвазига “Челси”га ўтди. Кетар чоғи, Торрес оқибатини ўйламай бир гап айтиб юборади: “Мен кучлироқ, каттароқ клубга ўтдим”. Унинг бу сўзлари учун “қизиллар”нинг миллионлаб мухлислари ундан нафратлана бошлади. Эҳтимол, шунинг учун ҳам унинг “Челси”да омади келмагандир. Тўғри, у ЧЛ ва Европа Лигасида ғалаба қозонди, лекин барибир ўзини тўлиқ намоён эта олмади. Қадрдон “Атлетико”га қайтган бўлсада, Торрес “Ливерпуль”га бўлган “симпатиясини” яширмади ва жамоа иштирокини мунтазам кузатиб боришини айтиб ўтди. 2015 фил Стивен Жеррарднинг хайрлашув ўйинида эса мухлислар яна унинг исмини айтиб қўшиқ куйлашди. Хўш, “Ливерпуль”ни тарк этиб, хато қилмадингми болакай?

Ким: Златан Ибрагимович
Қаердан: “Барселона”
Қаерга: “Милан”
Сабаб: мураббий билан келишмовчилик
Қачон: 2010 йил
Златан Ибрагимович ҳеч қачон ўз эркинлигини талаб қилишдан уялмаган. Унинг “Барселона” таркибидаги иштироки болаликдаги орзунинг ушалаётганидан дарак берарди. Бироқ ҳаммаси у хоҳлагандек бўлмади ва бугун Ибра у даврни фаолиятининг нурсиз бир саҳифасидек ёдга олади.

Ибрагимович Пеп Гвардиола билан тил топиша олмади. У асосий ҳужумчи сифатида майдонга тушади. Лекин вақт ўтиб, испаниялик мураббий унинг позициясини ўзгартиришга уринди, баъзи ўйинларда эса буткул заҳирада қолдира бошлади. Гвардиола жамоасидаги барча нарсани  тўлиқ назорат қилишни истаган, лекин Златан ўзи хоҳламаган ишини қилишга ўрганмаган ва уни бунга мажбурлаб ҳам бўлмайди. Натижада кийиниш хонасида жанжал келиб чиққан ва Златан мураббийни форварднинг имкониятларидан тўғри фойдалана олмаётганликда айблаган. “Тасаввур қилинг, сиз “Ferrari” сотиб олдингизда, аммо унда “Fiat”да ҳаракатланаётгандек ҳайдаяпсиз”, — Ибра мураббийнинг ишини ана шу сўзлар билан ифодалаб берган. У Пепни қўрқоқ ва ўзи ишлаган энг ёмон мураббий деб атаган. Ибрагимович “Барселона”да бор йўғи бир йил ўйнаган ва “Милан”га ижарага йўл олган. “Россонерлар” шведни бир мавсумдан сўнг, атиги 24 миллион евро эвазига сотиб олган.      

Златан Италияда ўзини етакчи сифатида ҳис қила бошлади. У ҳар ўйинда ўртача ҳисобда 1,5та гол урган ва “Милан” клуби билан жамоа учун ҳозирча сўнгги бор “Скудетто”да зафар қучди. Ибра ПСЖга кетди ва биз ўрганганимиз кучли “Милан” ҳам қаергадир ғойиб бўлди.    

Ким: Вильям Галлас
Қаердан: “Челси”
Қаерга: “Арсенал”
Сабаб: “ўзига хос” характер
Қачон: 2006 йил
Вильям Галлас “Челси”да 2000 йиллар бошида пайдо бўлади ва ўртамиёна клубдан, мамлакат етакчиларидан бири “туғилиши”да бевосита иштирок этади. Француз ҳимоячиси Раньери даврида орқа чизиқнинг чинакам етакчиси бўлган, Моуринью эса Вильямдан жокер сифатида фойдаланган ва муаммоли нуқтага қўрқмай қўяверган.

“Челси”га қувонч ҳам, мағлубиятлар ҳам бир пайтда келди. Галлас унга бўлган муомаладан қониқмай жанжал кўтарди ва клуб билан шартнома муддатини узайтиришни хоҳламади. Етмаганига, у “Челси”нинг муҳим ўйинларида иштирок этишдан бош тортди, терма жамоа ўйинларидан кейин белгиланган вақтдан анча ўтиб клубга қайтди ва шартнома тузиш ҳақидаги таклифни раҳбарлар юзи томонга отиб юборди. Агар уни яна “Челси”да ўйнайга мажбар қилишса, ўз дарвозасига гол уришини ёки индамай майдондан чиқиб кетишини айтган.

Ўзининг “кўклар” сафидаги охирги мавсумида йил рамзий термасига киритилди. Кейин эса азалий рақиб “Арсенал” сафига ўтиб кетди. Бунинг учун жамоадошларининг нафратига дучор бўлди. Қизиқ жиҳати шуки, Галлас “канонирлар”дан сўнг, Лондоннинг бошқа бир клуби “Тоттенхэм”га кўчиб ўтади, кейинроқ эса австралиянинг “Перт Глори” уни ўз сафига чорлайди ва айнан ўша ерда Вильям фаолиятини якунлайди.

Ким: Микаэль Лаудруп
Қаердан: «Барселона»
Қаерга: «Реал»
Сабаб: мураббий билан келишмовчилик
Қачон: 1994 йил
1989 йил “Барселона” 5 мавсумдан буён Ла Лигада ғолиб бўла олмаётганди. Жамоанинг ўша пайтдаги бош мураббийи Йохан Кройф даниялик ярим ҳимоячи Микаэль Лаудрупга қизиқа бошлади. Айнан Кройф талабига кўра, жамоа Микаэлни сотиб олади ва мураббий адашмаганига амин бўлади. Футболчи келибоқ “кўк-анорранглилар” ўйинидаги энг муҳим фигуралардан бирига айланади. Айниқса у яхши ўйин кўрсатгани учун ҳам, жамоа чемпионлик совринига эга чиқади. Даниялик футболчи каталонияликлар билан ундан кейин яна 4 маротаба Ла Лигада ғалаба қозонади.        

1994 йилги Чемпионлар Лигаси финали катта жанжалга сабаб бўлганди. Йохан Кройф негадир “Милан” билан бўлган баҳс қайдномасига Лаудрупни киритмайди. “Барселона” 0:4 ҳисобида мағлубиятга учраганди. Жаҳли чиққан  Микаэль эса клубдан кетишини маълум қилган.

“Барселона” мухлислари у жамоада қолишини илтимос қилиб, футболчига хат ёзишади. Ўшанда хатга 30 мингта мухлис қўл қўяди. Аммо бу ҳам Лаудруп қарорини ўзгартиролмайди. Эрталаб каталониялик мухлислар ёқимтойи бўлган Лаудруп “Реал” билан шартнома имзолаган ва ашаддий душманга айланган.          

“Қироллик клуби” сафида “Камп Ноу”га биринчи сафарида футболчини чидаб бўлмас, хуштакбозликлар остида қарши олишади. Майдонга тушиб келар экан Лаудруп кўплаб баннерларни кўради ва танаффусда ўзини алмаштиришларини сўрайди.

Микаэль “Реал”да чемпион бўлди ва Испания чемпионатининг чорак асрдаги энг яхши легионери бўлди.

Аммо уни кўкларга кўтарган “Барселона” мухлислари учун у шунчаки сотқин бўлиб қолаверди.

Нозима Зарипова таржима қилди