Мухлислар қуршовидаги Одил ва Элдор, бизнес классни рад этган Купер. Фаластиндан "championat.asia" кундалиги
04 сен 2019 05:33
Новости
![](https://championat.asia/upload/storage/516217_original.jpg)
![](/upload/storage/516217_220.jpg)
Мухлислар қуршовидаги Одил ва Элдор, бизнес классни рад этган Купер. Фаластиндан "championat.asia" кундалиги
Терма жамоамиз билан бирга "championat.asia"инг икки нафар ходими Гайрат Хасбиулин ва Толибжон Қосимовлар ҳам Фаластин сари йўл олдик.
"Championat.asia" нашри ходимлари Фаластин, Иордания ва Тожикистонга сафар қилади
ФОТО Мухлислар Ўзбекистон терма жамоасини аэропортга ажойиб тарзда кузатиб қўйишди
Эктор Купер бошчилигидаги терма жамоамизни мухлислар ўзига хос тарзда кузатиб қўйишди. Ўша жараённи кечаги галерея ва видео хабарларимизда томоша қилиб улгургансиз. Биз эса бош жамоамизнинг Тошкентдан Фаластингача қандай етиб келгани ҳақида икки оғиз маълумот беришга ҳаракат қиламиз.
Терма жамоамизда айни пайтда Одил Аҳмедов ва сўнгги кунларнинг бош қаҳрамони Элдор Шомуродовларнинг мухлислари кўпроқ эканлигига аэропортдаёқ гувоҳ бўлиш мумкин эди. Футболга қизиқувчи одамлар терма аъзоларидан кўпроқ айнан Одил ва Элдор билан суратга тушиб кетишди. Уларнинг ҳар бири самимий тилаклар билан терма жамоамизга омад ҳам тилаб кетишди. Аҳмедовнинг мухлислари орасида 3 нафар тожикистонликлар ҳам топилди. Охирги ҳафталарда трендда бўлиб турган Шомуродовда ҳам мухлислари кўпайиб қолгани кўриниб турибди. Шунга қарамай, ҳужумчимиз ўша-ўша самимийлик ва соддаликни йўқотмаган. Элдорнинг ўйинига ҳам, одоб-ахлоқига ҳам кўз тегмасин.
Аҳмедовнинг тожикистонлик мухлислари.
Ўзбекистон миллий терма жамоаси делегацияси жой олган самолёт 16:02да Тошкентдан қўзғалди ва деярли 5 ярим соатлик парвоздан сўнг Исроилнинг Тель-Авив шаҳрига етиб келди. Шуни қўшимча қилиш керак-ки, бош мураббий Эктор Купер бизнес-классда кетишни рад этди ва жамоа билан бирга эконом классда учди. Ўтган йил инглиз футболи афсонаси Уэйн Руни "Ди Си Юнайтед" билан сафар ўйинига борганда самолётнинг бизнес-классидан ҳам, меҳмонхонанинг люкс номеридан ҳам воз кечганди. Ўшанда у ўзимни жамоадагилардан устун қўйишни хоҳламайман, биз бир жамоамиз деганди. Купер ҳам жамоа ичида бўлишни хоҳлади, бўлиб ҳам ора-орада ўйинчиларнинг олдига бориб улар билан ҳазиллашиб туришга ҳам улгурди.
Купернинг ушбу суратидан ҳеч ким ёмон маъно қидириб ўтирмаса керак) Шунчаки, мураббий ўйинчилари билан бирга учгани исботи билан бўлиши учунгина бу суратни қўйишга қарор қилдик.
Делегация Тошкент вақти билан 21:50да Тель-Авивдаги Бен-Гурион аэропортида эди. Бен-Гурион дунёдаги энг синчиклаб текширув-назорат ўтказиладиган аэропортлардан бири. Аэропортдан чиқишда бизни махсус автобуслар кутиб турарди. Терма жамоа аъзолари катта автобусда, CA ходимлари, Тошкентдан терма жамоани қўллаб-қувватлаш учун келган Абдураҳмон Фозилов ва ЎФА фотомухбири Ҳасан Пирмуҳаммедов эса махсус микробасда Тель-Авивдан Фаластиннинг Рамаллаҳ шаҳрига етиб бордик.
А.Фозилов билан байроқ кўтариб суратга тушаётган ўзбек йигит Исроилда ишлар экан. Терма жамоа учиб боришини ўқиб атайлаб аэропортга чиқибди. Бу йигит эртага Фаластиндаги стадионга боришга ҳам ваъда берди.
Делегациямиз Рамаллаҳдаги "Millennium" меҳмонхонасига жойлашди. Қизиғи, Фаластин терма жамоаси ҳам айнан шу меҳмонхонада экан. Эртанги рақиблар битта жойда истиқомат қилишмоқда.
Бугун ўйиндан олдинги қатор расмий тадбирлар, шу жумладан матбуот анжумани ҳам бўлиб ўтади. Футболчиларимиз оғир йўлдан сўнг чарчоқларини чиқариш учун хордиқ чиқараётган бир паллада биз ҳам кундалигимизни якунлаймиз. "Championat.asia"ни кузатишда давом этинг, Фаластин ва Иорданиядан энг қайноқ хабарлар ва суратларни кузатиш имконига эга бўласиз.
"Championat.asia" шиори: Орзу қилинг, завқланинг ва бизни кузатинг!
Похожие новости
![AMP Logo](https://championat.asia/image/logo-amp.png)
Комментарии