Миржалол Қосимов: "Соғинтириб қайтдим" (тўлиқ версия)
05 мая 2017 15:30
Новости
![](https://championat.asia/upload/storage/251841_original.jpg)
![](/upload/storage/251841_220.jpg)
Миржалол Қосимов: "Соғинтириб қайтдим" (тўлиқ версия)
![](https://championat.asia/upload/storage/251818_680.jpg)
Мурод Алиев "Бунёдкор" бош директори: - Сўнгги пайтларда жамоанинг ўйинлари туфайли ўзгаришлар бўлиб ўтди. Нега бу каби ўзгаришлар бўлди? Бунга жамоанинг охирги пайтларда кўрсатган ўйинлари ва натижалари сабаб бўлди. Ҳозирги кунда "Бунёдкор" мусобақа жадвалида қайси поғонада тургани кўпчиликка маълум. Шу боис Миржалол Қосимовни жамоага қайтардик ва унинг олдига клубни яна аввалги мавқеини тиклаш вазифаси қўйилди. Ўйлайманки, Қосимовни жамоага қайтариш тўғри қарор бўлди. "Бунёдкор"ни ўз тарихи бор ва буни барча билади.
Бизнинг клуб ажойиб ва кўркам стадионга эга. Бу гўзал стадионимиз Биринчи Президентимиз Ислом Абдуғаниевич Каримов томонидан лойиҳа қилинган ва қолаверса, ҳозирги Президентимиз Шавкат Миромонович Мирзиёевнинг шахсан ўзлари бу қурилишларда бош-қош бўлганлар. Бу стадионнинг бу каби катта қурилиши халқимиз, футбол ишқибозлари футболдан роҳат олиб кетишлари учун қилинган ишлар. Аммо сўнгги йилларда стадионга томошабинларнинг келиши камайиб кетди. Ўйиндан-ўйинга мухлислар ташрифи кескин камайиб кетди. Фақатгина Самарқанд ёки Намангандаги ўйинларда стадионлар тўлиб тошмоқда. Чунки улар ўзига яраша футбол кўрсатишмоқда ва шунга яраша мухлислар ташрифи ҳам уларда яхши. "Бунёдкор"да ишқибозлар ташрифи камайиб кетганига ўйинимизнинг пастлигида деб биламан. Шу нуқтаи назаридан бир қатор ўзгаришлар бўлмоқда ва бу ўзгаришлар клубимизни яхши йўналишга солиб олгунимизга қадар давом этади. Биз ҳам яқин вақт ичида томошабинларни стадионга қайтариш борасида иш олиб борамиз. Барчамиз ҳамжиҳатликда ишласак, бир жамоа бўлиб қовуша олсак, ўйлайманки, муваффақиятларга эришамиз.
Охирги кунларда "Пахтакор"да катта ўзгаришлар бўлди. Бу ўзгаришглар келажакда ўзбек футболининг ўсишига хизмат қилади, деб ўйлайман. Тўғри, федерациямиз, давлатимиз тарафидан футболга жуда катта ўзгаришлар қилинди. Лекин сўнгги пайтларда терма жамоамизнинг ҳам, клубларимизнинг ҳам қандай даражада эканлигини кўриб турибсизлар.
Футболимизда соғлом рақобат бўлса, ўйлайманки, албатта футболимиз кучаяди. Биринчи навбатда бундан мухлислар ютишади. Миржалол Қосимовга фақатгина омад тилайман. Бизнинг биринчи галдаги вазифамиз, стадионимизни мухлислар билан тўлдириш.
Миржалол Қосимов "Бунёдкор" бош мураббийи: Журналистларни кўриб турганимдан хурсандман. Бу жамоа менга бегона эмас. Буни жуда яхши биласизлар. Бир нарсани айтмоқчидим, Сергей Лушанга катта раҳмат айтмоқчиман. Истеъфо бу футболнинг бир қисми. Мураббийларда бўлиб туради. Ҳамкасбимга кейинги фаолиятида омад тилайман. Мураббийнинг қисмати шундай. У академияда яхши иш олиб боришига ишонаман. Лушан билан биргаликда, ҳамжиҳатликда ишлаймиз деб ўйлайман. Футбол бу мухлислар ва ишқибозлар билан гўзал. Биринчи ўринда стадионимизга мухлисларни қайтаришни истаймиз ва бунинг учун меҳнат қиламиз. Футболда ғалаба ва мағлубият бўлиб туради. Футбол тепалик ва пастликлардан иборат. Футболимизнинг эски мадҳиясини қайтаришимиз керак. Шундай оғир вазиятда журналистларимиздан илтимос қилардим, иложи борича футболчиларни қўллаб-қувватлашса яхши бўларди. Ҳозирги кунда футболчилар барча ижтимоий тармоқ ёки газета ва сайтларни ўқиш имкониятига эгалар. Футболчилар барчасини кўришади ва ўқишади. Душанба куни жамоа ОЧЛ доирасидаги 6-турини "Ал Айн"га қарши ўтказади. Гарчи ОЧЛда имкониятларимизни йўқотган бўлсакда, "Бунёдкор"ни ўз номи бор. Шунинг учун, имкон қадар "Ал Айн" билан муносиб ўйнаб келишларини футболчиларимизга алоҳида таъкидлаймиз ва илтимос қиламиз. Шундан сўнг бор эътиборимиз олий лига ва кубок баҳсларига қаратамиз. Нимагаки, чемпионатиимизнинг ва жамоамизнинг эски мадҳиясини қайтаришимиз керак. Халқаро мусобақада иштирок этмоқчи бўлсак, кубок ҳамда чемпионатимизга бор кучимизни ташлаймиза ва шунга ҳаракат қиламиз. Таркибимизда кўп ёшлар бор, аммо уларга барибир тажрибали футболчилар керак. Шу боисдан ҳам давралар оралиғида селекция ишларини олиб борамиза ва таркибимизни кучайтиришга ҳаракат қиламиз. Футболчиларга русча айтганда "свежость", янгилик етишмаяпти. Ёшлар кимгадир интилишлари керак ва улар тажрибали футболчиларга қараб туриб, ўсишлари керак.
"Бунёдкор"нинг мақсади чиройли ўйнаш ва охиригача курашиш. Хато барчада бўлади. Аммо улардан хулоса чиқаришни ҳам билиш керак. Футболчилар ҳам хато қилишади. Лекин шижоат йўқолиши керак эмас. Европада ҳам юқори даражадаги футболчилар хато қилишади, лекин мухлисларнинг қарсак чалиши ҳамда ўша хато қилган футболчини рўҳлантириши натижасида футболчилар ишқибозларга бор ўйинини намоён этади. Фурсатдан фойдаланиб, мухлисларимизни "Бунёдкор"ни қўллаб-қувватлашга чорлардим. Миллий чемпионат ўйинларимизга келиб, жамоамизга мададкор бўлишларини истайман. "Бунёдкор"нинг мухлислари ҳам жуда кўп. Жамоамиз доимо ишқибозлар учун ўйнайди. Барча мухлисларни стадионга чорлаб қоламиз, - дейди Қосимов.
Миржалол Қосимов билан бирга жамоага Александр Волков ва Шуҳрат Мақсудов келишди. Эртага клуб ОЧЛ доирасидаги баҳсни ўтказиш учун БААга учиб кетади. Ҳужжатлар расмийлаштиришдаги тиғиз вақт туфайли Миржалол Қосимов БААга бора олмайди. Шу боис "Бунёдкор"ни "Ал Айн" билан ўйинда Виктор Карпенко мураббий сифатида бошқаради. Ушбу ўйиндан кейин Қосимов бошчилигидаги мураббийлар штаби тўлақонли иш фаолиятини бошлайди.
- Икки йил кичик вақт эмас. Ҳеч қаерда ишламадингиз. Шувақт мобайнида нималарни ўйладиз, қандай режалар қилдиз? Ҳеч бир мураббий ўз жойида қотиб қолмайди. Селекция, мураббийлар штаби ва ўзингизни қандай фаолият олиб боришингиз бўйича режаларингиз билан ўртоқлашсангиз.
Миржалол Қосимов: - Соғинтириб қайтдим (кулади). Авваламбор соғлигимни тиклаб олдим. Охирги йилларда жуда кўп "нагрузка", босим бўлди. Фаол ҳордик чиқардим. Лекин бу билан футболдан йироқлашиб кетмадим. Ўйинларни кузатиб бордим. Терма жамоамиз, клубларимизнинг халқаро ва ички чемпионат ўйинларини кузатиб бордим. Жонажон жамоаларимизга мухлислик қилдим. Куч йиғиб, ҳали айтганимдек соғинтириб қайтдим. Қўлимдан келганча ўзбек футболи ва "Бунёдкор"нинг мавқеини тиклашга ҳаракат қиламан. Қолаверса, ҳозирги илк вазифамиз яхши натижага эришиб, авваламбор чемпионатдаги ўрнимизни тўғрилаб олиш. Ҳозирги ҳолатдан келиб чиқсак, "Бунёдкор"нинг биринчи даврадаги охирги ўйинлар тақвими биз учун оғир. Футболчилар билан ҳам суҳбатлашдик, машғулотлар ўтдик. Ортда қолган давр энди тарих. Энди клуб тарихида янги саҳифа очиб, "Бунёдкор"нинг мадҳиясини қайтариш. Буни биргаликда амалга оширамиз. Муҳими, жамоада югуришни биладиган футболчилар бор. Футболни ҳозир туриб ўйнаб бўлмайди. Футболда айни пайтда фақат ҳаракатланмоқ зарур. Футболчилар билан яккама-якка гаплашиб олдик. Жамоадаги ички муҳит қандай эканлигини ҳозирча билмайман. Четдан қараганда осон, лекин ички муҳит билан танишиш керак. Ички муҳит билан яқиндан танишиб олгач қолганини кўрамиз. Таркибда яхши футболчилар бор. Улар билан ишлаймиз ва таркибни кучайтирамиз.
- Клуб сиёсати ёшларни ўйнатиш эди. Энди нима бўлади? Таркибда янгилар бўладими?
Миржалол Қосимов: - Айни пайтда бўлмайди. Сабаби биринчи давра охиригача янги футболчи қўша олмаймиз. Давралар оралиғида трансферлар амалга оширилади. Ёшларга барибир тажрибали шериклар керак. Улар тажрибали ва малакали футболчилар олдида тобланишади. Ёшлар ўзларидан кучлироқ ва тажрибалироқ футболчилардан ўрганишлари керак. Ҳар бир чизиқда тажрибали футболчилар бўлмоғи лозим. Чунки улар ўз ортиларидан ёшларни эргаштира олишади. Айнан жамоани ўз ортидан эргаштира оладиган кучли ва яхши фуктболчиларни жамоага жалб этишга ҳаракат қиламиз.
- Балки саволим ноўриндир ҳозир. Лекин ҳозирда барчани қизиқтираётган саволни бермоқчиман. Айни пайтда пешқадамлар билан орадаги тафовут 9 очкони ташкил этмоқда. "Бунёдкор"га эса Миржалол Қосимов қайтди. "Қалдирғочлар"ни чемпионлик пойгасига қайтара оласизми?
Миржалол Қосимов: - Тарихдан айтиб бераман. Адашмасам, 2012 йили "Бунёдкор" таъқибчиларидан 7 очко ўзиб кетганди, якунда "Пахтакор" чемпион бўлиб кетганди. Ўшанда ҳам 6 ёки 7тур қолганди. Футболда ҳамма нарса бўлиши мумкин. Муҳими, фуктболчиларда ва барчада иштиёқ бўлиши лозим. Футболчиларга ҳам шундай кўркам стадионда мухлисларсиз ўйнаш қизиқ эмас. Шундай экан, қўл остимиздаги ушбу ажойиб стадиондан унумли фойдаланишимиз зарур. Трибуналар ишқибозлар билан тўлиб-тошмаса, унда футболчилар ҳам роҳат олишмайди. Авваламбор шунга ҳаракат бўлади ва буни футболчиларга сингдириб борамиз. Шундай экан ҳали имконият бор. Эндигина саккизта тур бўлиб ўтди. Лекин Биринчи давранинг охирги учрашувлари жуда оғир ўтади. "Насаф" билан ўтказиб юборилган ўйин турибди. "Шўртан" билан сафарда, "Пахтакор", "Навбаҳор" меҳмонда, "Қўқон-1912", "Локомотив" билан қийин ўйинлар турибди. Олдинда учрашувлар кўп. Яхши ниятлар билан майдонга тушиб, олдимизга яхши мақсадларни қўямиз.
- Сергей Лушан клуб тизимида қоладими?
Мурод Алиев: - Унинг клуб билан шартномаси бор. Мўлжалимиз академияда унга қайсидир ёш тоифасидаги жамоани бериш. Агар у ерда яхши ишлаб, ишончни оқласа, унда Лушанни қолдирамиза. Умуман олганда, академиямизда катта ўзгаришлар бўлади. Академиядаги ҳар бир мураббийнинг иш фаолиятини кўриб чиқамиза. Академия директори бошқаттан сайланади. Ҳозир бир яхши режамиза бор. Агар бу режа ўхшаса, унда бир ажойиб мутахассисни академияга олиб келамиза. Лушаннинг кейинги тақдири 3 кун ичида аниқ бўлади.
- Лушан ўша кунги матбуот анжуманида "Бунёдкор"нинг молиявий ҳолати яхши эмаслигини айтди. Бундан 10 йил аввал "Бунёдкор" келиб, олий лигада "Пахтакор"га рақобат қилганди. Ўшанда бу икки клубнинг ўзаро рақобатидан терма жамоамиз ҳам манфаат кўрганди. Чемпионатимизга файз кирганди. "Пахтакор"да ҳам яқинда ўзгаришлар бўлди. Бу иккала жамоа ҳозир таркибга футболчи жалб эта олмайди. Барибир асосий иш кейинги мавсумда бўлади. Кейинги йилги рақобатга "Бунёдкор"нинг молиявий ҳолати дош бера оладими?
Мурод Алиев: - Тўғрисини айтса, футболда молиявий жиҳатдан ҳам асосий ўринни беради. Ўйлайманки, бизларда ҳамма нарса етарли даражада бўлади. Лушан айтдики, жамоанинг тажрибали футболчиларни ушлаб туролмадик деди. Мен бу фикрни нотўғри, деб ўйлайман. Масалан ҳозир "Насаф"да ўйнаётган Акмал Шораҳмедовни ҳам ушлаб туриш мумкин эди. Лекин бу ҳаёт. Футболчилар маоши оддий халқникига нисбатан бироз каттароқ бўлади. Чунки спортчиларнинг фаолияти қисқа давом этади. Бу нарса бутун жаҳонда шундай. Нима демоқчиман, "Бунёдкор"да маошлар билан муаммо бўлмайди. Кеча раҳбарият, клубнинг янги президенти футболчиларнинг маошларини ўтказиб беришди.
Ҳозир жамоадаги легионерларни Миржалол Қўшоқович билан кўриб чиқамиз. Легионерларнинг бири 10 дақиқа қолганида қўйилмоқда, иккинчиси эса умуман тушмай қўйди. Энди савол туғилади, олдинги раҳбарият нимага қараб легионерларни олишган? Бизлар легионерлар олаётганда ҳам бу жиҳатларга эътибор берамиза. Лекин легионерларни олишимиз шарт. Чунки жамоамиздаги кўпчилик футболчилар ҳали ёш. Жамоага албатта тажрибали футболчилар керак бўлади.
- Ҳозир чемпионатимиздаги деярли барча жамоаларда 20 дақиқалик легионерлар кўпайиб кетган. Украина, Россия ва бошқа давлат жамоалари асосан аниқ бир компания билан селекция ишларини пухта олиб боришади. Сифатли легионерлар олиб келиш учун аниқ бир кучлироқ компания билан шартнома тузиб, ҳамкорлик қилиш режаси борми? Ҳозир бизларни жамоаларимизга келаётган легионерларнинг кўпчилиги мавсум олди йиғинда ўзини кўрсатиб, кўтарма пулини олиб, шартнома имзолаганидан кейин ўйнамай қўймоқда.
Мурод Алиев: - Жуда тўғри савол. Албатта. Мен илк бор клуб бош директори бўлдим. Режалар ва лойиҳаларимиз кўп. Уларни босқичма босқич амалга оширамиз. Адашмасам, ҳозирги кунда ўзбек клубларида 30 яқин легионер футболчилар ўйнашмоқда. Аммо уларнинг қай даражада маҳаллий футболчилардан устунлигини ўзларингиз ҳам кўриб турибсизлар. Бу нарсага жиддий қараш керак. Бу борада мураббийлар, клуб раҳбарлари ишлашади. Легионерларга тўланаётган пул бу Ўзбекистоннинг пуллари. Улар тўланаётган пулларни оқлашмоқдами? Шуни кўриб чиқиш керак. Биз имкон қадар шу пулларни оқлайдиган футболчиларни жамоага жалб этмоқчимиз. Бу сафар бошқача бўлади.
Нарзулла Сайдуллаев
Похожие новости
![AMP Logo](https://championat.asia/image/logo-amp.png)
Комментарии