Матбуот анжумани (тўлиқ). Ўзбекистон аёллар терма жамоаси бош мураббийи Котрина Кулбите: "Футболчиларда катта салоҳият бор, мақсадимиз Жаҳон чемпионати ва Олимпиадага йўлланма олиш"

Бугун ЎФА мажлислар залида терма жамоамизнинг янги устози ва ОАВ ўртасида матбуот анжумани бўлиб ўтди. Унда журналистлар ўзларини қизиқтирган саволлар билан мурожаат қилишди. 

"Мен Ўзбекистонда иш бошлаганимдан хурсандман. Бу мамлакат катта тарихга эга. Ўзбекистонда футболга катта эътибор беришмоқда, буни тушуниб турибман. Таклиф тушганида бир қарорга келишим қийин бўлмади. Яқинларим билан маслаҳатлашган ҳолда келишувга эришдик. Ўзбекистон аёллар терма жамоаси билан катта ютуқларга эришишимга ишонаман",- дея гап бошлади Котрина Кулбите. 

- Янги жамоа, бошқача муҳит, даражаси турлича бўлган жойга келаётганингизда ўша мамлакат футболи, чемпионати, аёл футболчиларини ўрганиш сиз учун қанчалик муҳим? Сизда қандай хулосалар бор?

- Ўзбекистон аёллар терма жамоасини аввалдан билганман. Уларга қарши турли мусобақаларда ўйнаганмиз. Бу ерга келганимда футболчиларни билиб олишим учун ЎФА раҳбарияти ўқув-машғулот йиғинини ташкил қилиб берди. Бундан хулосам шу бўлдики, Ўзбекистон аёллар терма жамоаси футболчиларида жуда катта салоҳият бор. 

- ЎФА сиз билан музокара жараёнида олдингизга аниқ вазифа қўйдими?

- Ҳозирги кундаги асосий эътиборимиз Осиё чемпионати саралашига тайёргарлик кўриш. Кейинги йилда Осиё чемпионати бўлиб ўтади. Мақсадимиз Жаҳон чемпионати ва Олимпиада ўйинларига йўлланма олиш. Хабарингиз бор, бу мусобақаларга квоталар сони кўпайтирилган. 2029 йилги Осиё чемпионати Ўзбекистонда бўлиб ўтади. Бунда ҳам юқори натижаларни қўлга киритишни мақсад қилганмиз. 

- Ўзбекистон терма жамоасида аввал япониялик мураббий Мидори Хонда ишлаганди. Бунда тил билан боғлиқ муаммо бўлганди. Бу сафар бош мураббий МДҲ мамлакатларидан қидирилди. Футболчилар билан мулоқотда муаммо бўлмайдими?

- Мен рус тилида тушунаман ва гапира оламан. Футболчилар билан мулоқотда муаммо йўқ.

- Аксарият мамлакатларда катта футболдаги қизлар футзалда ҳам ўйнашади. Ўзбекистонда аёллар футзал жамоалари йўқлиги учун футболдан олинади. Ёзда аёллар ўртасида Осиё чемпионати бор. Катта футболда эса саралаш ўйинлари кутиб турибди. Бу паллада қизларни футзалга қўйиб юборасизми?

- Мазкур масалада муаммо бўлмайди. Биз футзал федерацияси билан биргаликда буни кўриб чиқамиз. Ўйлайманки, қизлар футзалда ҳам, футболда ҳам ютуқларга эришишади. Ҳозирда CAFA турнири бўлиб ўтмоқда. У ерда Феруза, Илвина каби ўйинчиларимиз тўп тепмоқда. Тажрибали футболчилар катта футболда ҳам керак. 

- Сизнинг бошчилигингизда йиғин ташкил қилинди. Ушбу машғулотлардан қандай таассуротлар олдингиз?

- Бир нарсани унутмаслик керакки, бу мавсум олди йиғини эди. Ҳозирда биз футболчиларнинг жисмоний сифатларини оширишга қаратмоқдамиз. Ҳайрон қолдиргани, уларнинг техник тайёргарлиги. Улар бу томондан тайёр. Биз ҳар доим юз фоизга тайёр бўлишимиз керак. 

- Ўзбекистонга ўз мураббийлар штабингиз билан келдингизми ёки бу маҳаллий мутахассислардан тузилдими?

- ЎФА мураббийлар жамоасини тақдим қилган. Владимир Панов, Маҳлиё Сарикова катта ёрдам беришмоқда. 

- Яқинда Жаҳон чемпионатига саралаш баҳслари бошланади. Қисқа вақт ичида нималарни яхшилаш керак?

- Тайёрланишга вақтимиз кам. Саралашга яхши ҳозирлик олиб бориш учун ўқув-машғулот йиғинларини олиб борамиз. Яқин орада 3 та учрашув ўтказишимиз режалаштирилган. Жанубий Корея, Иордания ва Таиланд билан ўйнаймиз. Бундан кейинги рақибларимизни ҳам эълон қиламиз. 

- Котрина Кулбите ОАВ, медиа билан ишлашга қандай қарайсиз? Очиқ мураббиймисиз ёки ёпиқ?

- ОАВ билан ишлашга ҳар доим тайёрман. Аёллар футболи ҳақида кўпроқ гаплашишимиз керак. Ҳар қандай ёрдам керак бўлса марҳамат. Аёллар футболини янги чўққиларга олиб чиқишни ният қилганман. Мен ҳам мураббий, ҳам инсон сифатида ўз ҳиссамни қўшишга ҳаракат қиламан. Аёллар футболи атрофидаги инсонлар ҳам ўз ишларини қилиб ютуқларга ёрдам беришлари керак.

- Осиёдаги кучли жамоалар Австралия, Япония даражасига чиқиш учун кўпроқ нималарга урғу қаратиш зарур?

- Биз ҳар бир ФИФА кунларида керакли йиғинлар, учрашувлар ташкил қилишимиз даркор. Бу орқали ўзимизнинг даражамизни кўтариб борамиз. 

- Ўзбекистонда ҳар доим яшайсизми? Аёллар чемпионатининг вилоятлардаги учрашувларини кузатасизми?

- Ҳа, мен иш вақтим Ўзбекистонда бўламан. Нафақат терма жамоада, балки скаутинг, мураббийларни ривожлантиришда ёрдамимни бераман. Яқинда "Бунёдкор" ва "Пахтакор"нинг ўйинларини кузатдим ва керакли маълумотларни тўпладим. Аёллар футболига эътибор эркакларникига қараганда кучлимас. Лекин ҳар бир эркаклар футбол клуби аёллар жамоасига эга бўлиши керак. ЎФАда аёллар футбол бўлими бор. Ҳамма ривожланишга биргаликда ҳисса қўшиши керак. 

- Европа ва Осиё аёллар футболи даражасида қандай фарқ бор?

- Европа футболи ривожланган. Биз баъзи бир Европа мамлакатлари терма жамоалари билан ўйнамоқчимиз. Уларда кучли жамоалар кўп.

Абдулазиз Искандаров ёзиб олди