Жаҳонгир Жиямуродов: "Бугунги ўйиндаги ҳакамлик кўриб чиқилса ёмон бўлмас эди"

"Авваламбор, ғалаба билан "Турон" жамоасини табриклайман, яхши ўйин бўлди. Ўйин ҳақида айтадиган бўлсам, икки жамоа ҳам қайсидир маънода тенг ўйнади. Телевидение орқали ўйинни кузатиб борган мухлисларга ҳам бугунги ўйин жуда қизиқарли бўлгани аниқ. Балки бугунги баҳс Суперлига ўйинларидан кам бўлмади деб ўйлайман.

Ҳакамлар вазифасини баҳолаш менинг ишим эмас, лекин бугунги ўйинда ҳакамлик масаласини кўриб чиқишса ёмон бўлмас эди. Бунақа хатолар ҳакамлар томонидан қанчалик кам бўлса, бу уларнинг ўзбек футболига катта ёрдами бўларди.

Биринчи бўлим ҳақида айтадиган бўлсам, тўғри ўйинни биз кўпроқ назорат қилдик. Менимча, биринчи бўлим тенг ўйин бўлди. Чап қанот ҳимоячимизнинг кичик хатоси эвазига бошланган ҳужумдан гол ўтказиб юбордик. Иккинчи голни ҳам жуда тез ўтказиб юбордик.

Жамоада кўп нарса молиявий имкониятга тақалади. Лекин биз мавжуд имкониятдан келиб чиқиб ўйин намойиш этмоқдамиз. Бугунги ўйинда йигитлардаги иштиёқни ўзларинг кўрдинглар, манимча жамоанинг ўйини унчалик ҳам маблағга алоқадор эмас. Бу футбол, бизда ҳозирги кунда озгина омад етишмаяпти.

Майдон холати ҳақида гапирадиган бўлсак, озгина камчилиги йўқ эмас. Навбатдаги турни сафарда ўтказамиз, бу орада майдонимизда таъмирлаш ишлари олиб борилади" - дейди Жиямуродов.