Про лигада 2-ўринни олган клуб: "Суперлигада жой йўқ, деб қўяверинглар"

Кеча ПФЛ мана шу плей-офф ўйинлари саналарини эълон қилди. Унга кўра Про лига клуби 14 декабрь куни ўз майдонида Суперлиганинг энг омадсиз клубига қарши охирги йўлланма учун ўйнайди.

Суперлигада мавсум 30 ноябрь атрофида тугайди. Кейин 5 декабрь куни 12-ўрин 15-ўринни ўз уйида қабул қилади, 13-ўрин соҳиби эса 14-ўринни меҳмон қилади. Бу икки ўйинда ютганлар Суперлигада қолади. Иккита мағлуб эса 10-декабрь куни ўзаро битта ўйин ўтказишади. Ютган жамоа элитада қолади. Ютқазган эса юқорида айтганимиз Про лигада 2-ўринни банд этган клуби уйига сафар қилади. Бу баҳс 14 декабрга белгиланган.

Яъни бу ерга етиб келган Суперлига клуби 30 ноябрь, 5 ва 10 декабрь кунлари ўйинлар ўтказади. Яна 4 кундан кейин Про лига клуби билан беллашади.

Про лигада эса мавсум 16 ноябрь куни тугайди. Лекин 2-ўринни оладиган клуб ўзининг сўнгги учрашувини 9 ноябрь куни ўтказади. Демак қуйи лигада 2-ўринни олган клуб 14 декабргача 35 кун давомида расмий ўйин ўтказмайди. Бу вақт ичида клуб йиғин ўтказиши ва ўртоқлик учрашувларида майдонга тушиши мумкин. Лекин ноябрь охири ва декабрь ойи бошида қаердан рақиб топаркин?

Ўтган йил қандай бўлганди? Про лигада мавсум 28 ноябрь куни тугаган ва плей-офф 5 декабрь куни бўлиб ўтганди. Тўғри ўтган мавсум Про лигада бу йилгидек 6 эмас 8 та клуб иштирок этганди ва турлар сони 20 та эмас 28 та бўлганди.

Россияда ҳам бизга ўхшаш плей-офф баҳслари бор. Ўтган йил масалан Премьер-лигада ҳам, Миллий футбол лигасида (ФНЛ) ҳам мавсум бир кунда 24 май куни тугаганди. 28 май куни плей-офф баҳслари старт олганди. ФНЛда 18 та клуб, Премьер-лигада 16 та клуб бор эди.

Англияда ҳам плей-офф бор, лекин бошқачароқ. Премьер-лигада охирги 3 та ўринни олган клуб тўғридан тўғри қуйи лигага тушиб кетади. Чемпионшип лигада дастлабки икки ўрин соҳиби тўғридан-тўғри Премьер-лигага чиқади. 3-6-ўрин эгалари эса ўзаро ўйинлар ўтказиб битта йўлланма соҳибини аниқлашади. Бундай плей-офф тизимида иккита лига бир-бирига боғлиқ бўлмайди. Масалан, Премьер-лигада ўтган мавсум 19 май куни тугади. Чемпионшип лигада эса охирги 46-тур 3 май куни бўлиб ўтган. Шундан кейин плей-оффда иштирок этадиган клублар ўйинларни давом эттиришган бўлса, қолган клублар таътилга чиқиб кетишган.

Таклиф: Кейинги йил Про лигада нечта клуб иштирок этишидан қатъий назар Англияга ўхшаш тизим қилиниши мумкин. Суперлигада битта клуб тўғридан-тўғри Про лигага тушиб кетсин. Қолган айтайлик 4 та клуб ўзаро ўйинлар ўтказиб яна битта йўлланма эгасини аниқлашсин. Про лигада ҳам шундай 1-ўрин эгаси Суперлигага чиқсин, қолган нечтадир клуб яна битта йўлланма учун курашсин. Шунда иккита лига исталган вақтда тугайверади, плей-офф баҳслари ҳам бўлаверади. Агар Про лигадан Суперлигага чиқишни истайдиган клублар сони 2 тадан кам бўлса фақат биринчи ўрин Суперлигага чиқсин ва Про-лигада плей-офф ўтказиш ҳам шарт эмас. Чунки Суперлигага чиқишни хоҳлайдиган клублар сони 2 тадан кам бўлса Про лигадаги қолган клублар плей-оффда қатнашишдан маъно нима? 

Бу йил эса Про лигада 2-ўринни эгаллаган клуб 35 кун давомида футболчиларни тонусда ушлаб туришдан ташқари ўзининг уй стадионини декабрь ойи ўртасигача сақлаб туриши керак бўлади. Катта эҳтимол охирида эса Суперлига клуби осонгина ғалабага эришиб кетади.