Эртага "Локомотив" - "Насаф" ўйини

Режага кўра, ўйин соат 11да бошланиши керак. "Насаф" томони учрашувни табиий (чимли) майдонда ўтказишни сўраётган бўлса, "темирйўлчилар" сунъий қопламали майдони афзал билишмоқда.

Ўзбекистон вице-чемпионлари ҳозирги об-ҳаво шароитида майдоннинг сифатига путур етишидан ҳавфсирашяпти. Ҳар қандай ҳолатда ҳам назорат ўйини бўлиб ўтади. Фақат учрашув манзилига ойдинлик киритиб олинса бўлгани. Агар "Насаф" таклифи қабул қилинса, ўйин пойтахт вилоятида жойлашган "Локомотив"га қарашли "Дўстлик" стадионида ўтказилади. "Локомотив" ўз сўзида туриб олса, у ҳолда футболимиз етакчилари иштирокидаги ўйинга сунъий қопламали "Чилонзор" стадиони мезбонлик қилади.

Таъкидлаш жоиз, бу икки жамоа Ўзбекистон ХХII миллий чемпионати олий лигасининг 2-турида ҳам ўзаро Тошкентда тўқнаш келишади. Иккала жамоа ҳам 11 январдан ОЧЛ плей-офф ўйинига тайёргарликни мос равишда БАА ва Туркияда давом эттиришади.

Эслатиб ўтамиз, Рўзиқул Бердиев жамоаси 8 февраль куни ягона ўйиндан иборан плей-офф баҳсида Доҳада Қатарнинг "Ал-Жаиш" клуби меҳмони бўлади. Ҳаким Фузайлов шогирдлари эса худди шу куни Тошкентда "Ал-Қувайт" (Қувайт) - "Ал-Шорта" (Ироқ) жуфтлиги ғолибини қабул қилади. Бу жуфтлик 2 февраль куни ўзаро майдонга тушишади ва "Локомотив"га ким рўбарў келишига ойдинлик киритиб беришади.