"Бухоро" "Шўртан" билан 3:3 ўйнайдими?

Бунга сабаб жамоа иккинчи даврада ҳали мағлубиятга учрамаган бўлса-да, охирги учта беллашувда қаторасига дуранг қайд этди. "Бухоро" иккинчи даврани сафарда "Олмалиқ"қа қарши баҳс билан бошлаганди. 1:1 ҳисобидаги ўйиндан сўнг бухороликлар кейинги тўртта ўйинни ўз фойдаларига ҳал этишди. 

"Бухоро" ўз майдонида "Насаф" ва "Қизилқум"ни, сафарда эса "Обод" билан "Нефтчи"ни мағлуб этди. Лекин айнан "Нефтчи" устидан қозонилган ғалабадан кейин "Бухоро" кетма-кет уч учрашувда зафар қуча олмади. 

Улуғбек Бақоев шогирдлари дастлаб "Динамо" билан 0:0, кейин "Машъал" билан 1:1 ва ўтган турда "Металлург" билан 2:2 ўйнашди. Дуранглар кетма-кетлигига қаранг - 0:0, 1:1, 2:2. Агар шундай давом этадиган бўлса, "Бухоро" 24-турда Ғузорга бориб "Шўртан" билан 3:3 ўйнайдими?