АПЛ карвони йўлга чиқмоқда
13 авг 2016 14:37
Новости
![](https://championat.asia/upload/storage/218339_original.jpg)
![](/upload/storage/218339_220.jpg)
АПЛ карвони йўлга чиқмоқда
Юқоридаги таърифлардан гап Англия премьер лигаси ҳақида кетаётганини пайқаш қийин эмас.
Премьер лиганинг илк тури олдидан ўйинларга ва жамоаларга қисқача тўхталиб ўтишга қарор қилдик.
"Халл Сити" – "Лестер Сити"
Стадион: "The KCOM Stadium"
Бошланиш вақти: 13.08.2016, 16:30
Бош ҳакам: Майк Дин
Чемпионатни амалдаги чемпионнинг ўйини бошлаб беради. "Лестер Сити" бу учрашувда фаворит, ўтган мавсумга солиштирганда фақатгина Канте клубни тарк этиб, "Челси"га ўтди. Қолганлар шу ерда қолишди. Премьер лигага асос солинган 1992 йилдан буён амалдаги чемпион мавсумни мағлубият билан бошламаган (19 ғалаба ва 4 дуранг). Аксинча, Чемпионшипдан Премьер лигага чиққан жамоалар сўнгги бор 2012 йилда дастлабки турни ғалаба билан бошлашган. Ўшанда, "Вест Хэм" бу ишни уддалаган эди.
Ўтган йилги Марез - Варди жуфтлиги бу йил янада кучайди, сабаби ЦСКАдан Аҳмад Муса жамоага келиб қўшилди. Марез - Варди - Муса учлиги янги мавсумда рақиб ҳимоячиларига яхшигина бош оғриғи бўлади. Варди ва Мусадек супер тезликка эга ҳужумчиларни тўхтатиб қолиш учун ҳимоячилар тезликдан эмас, тўғри позиция танлашдан фойдаланганлари маъқул.
"Эвертон" – "Тоттенхэм"
Стадион: "Гудисон Парк"
Бошланиш вақти: 13.08.2016, 19:00
Бош ҳакам: Мартин Аткинсон
"Тоттенхэм" ўтган йили деярли бутун мавсум чемпионлик учун курашди ва якунда ҳатто иккинчи ўриндан ҳам қуруқ қолган эди. Эден Азарнинг голи "шпорлар"ни кумушдан ҳам махрум этганди ўшанда. Финишдаги бундай "зарба" жамоа руҳиятига қай даражада таъсир кўрсатганини бошланажак мавсумда билиб оламиз. Кейн - Алли жуфтлиги ўтган йилги натижаларни такрорлаши учун уларнинг ёнига яхши формага кириб олган Эрик Ламела қўшилади.
"Эвертон" ўтган мавсумни нотекис ўтказди ва бор йўғи 11 поғона билан чекланди. Рональд Куман бу йил жамоа ўйинини яхшилаши керак. Бунинг учун раҳбарият унга Идрисс Гуйе, Мартен Стекеленбург ва Эшли Уильямс каби футболчиларни олиб берди.
"Бёрнли" – "Суонси"
Стадион: "Терф Мур"
Бошланиш вақти: 13.08.2016, 19:00
Бош ҳакам: Жонатан Мосс
"Бёрнли" Чемпионшипда ғалаба қозонди ва АПЛга қайтди. Шон Дайч шогирдлари мавсумни "Суонси"га қарши уйдаги ўйин билан бошлашади. Чемпионшипдаги муваффақиятда энг асосий ролни ўйнаган Андре Грей Премьер лигада ҳам ўзини кўрсатишига умид қилса бўлади. Инглиз ҳужумчиси янги мавсумда ҳам клубининг етакчиси бўлиши аниқ.
Уэльсликлар бир нечта етакчиларини сотиб юборишди, аммо ҳужумга испаниялик Фернандо Льоренте ва Борха Бастон сотиб олинди.
"Мидлсбро" – "Сток Сити"
Стадион: "Риверсайд"
Бошланиш вақти: 13.08.2016, 19:00
Бош ҳакам: Кевин Фрэнд
АПЛга қайтган яна бир жамоа - "Мидлсбро". Айтор Каранка бошчилигидаги "боро" бу ерда кўпроқ вақт "ушланиб қолмоқчи". Таркиб бир қатор ўйинчилар евазига кучайтирилди, дарвозага эса Виктор Валдес ва Бред Гузан кади тажрибали киперлар жалб этилди. Камига ўтган йил барча ўйинларда ҳаракат қилган Димитриос Константопулос бор.
"Сток Сити" трансфер ойнасида унчалик фаол бўлмади. Марк Хьюзни ўтган йили "чақилмас ёнғоқ" таърифини олган йигитлар қаноатлантирмоқда, "Сток" фақатгина ўрта чизиққа "Ливерпуль"дан Жо Алленни сотиб олди.
"Саутгемптон" – "Уотфорд"
Стадион: "Сент-Мэрис"
Бошланиш вақти: 13.08.2016, 19:00
Бош ҳакам: Роджер Ист
Ҳар икки клубда ҳам бош мураббий ўзгарди. "Саутгемптон"га Клод Пюэль мураббий этиб тайинланган бўлса, "Уотфорд"ни энди Вальтер Маццари бошқариб боради. Ушбу мутахассислар янги жамоаларига қай даражада тайёрлай олганликларини тез орада билиб оламиз.
Бу қарама-қаршиликда мезбонларнинг имкониятларини юқорироқ баҳолаш мумкин.
"Кристал Пэлас" – "Вест Бромвич"
Стадион: "Селхерст Парк"
Бошланиш вақти: 13.08.2016, 19:00
Бош ҳакам: Крейг Поусон
Тони Пьюлис жамоаси ҳеч қачон Премьер лигадан тушиб кетмаган, лекин "Вест Бромвич"нинг трансфер ойнасидаги пассивлиги клуб келажагига шубҳа билан қарашга сабаб бўлмоқда. Аксинча, "Кристал Пэлас" ушбу ёзда Андрос Таунсенд, Жеймс Томкинс ва тажрибали Стив Мандандани ўз таркибига қўшиб олди.
"Манчестер Сити" – "Сандерленд"
Стадион: "Этихад Стэдиум"
Бошланиш вақти: 13.08.2016, 21:30
Бош ҳакам: Роберт Медли
"Манчестер Сити" сўнгги йиллардаги таркиби ва молиявий имконияти билан чемпионлик учун асосий даъвогарлар қаторига кириб олди. "Шаҳарликлар" бошқаруви янги мавсумда Хосеп Гвардиола қўлига ўтди. Испан мутахассиси "Барселона" ва "Бавария" билан кўплаб совринларни ютди. Лекин, АПЛда унга осон бўлмаслиги тайин. Англияда Испания ва Германиядаги каби "шунчаки" ўйинлар жуда кам. Бу ерда аутсайдерлар ҳам истаган вақтда фаворитлардан очко тортиб олиши мумкин.
Гвардиола жамоалари одатда АПЛга хос бўлмаган тўпни назорат қилишга катта эътибор қаратади. Пепнинг Премьер лига учун янги бўлган услуби қанчалик фойда келтиришини мавсум якунидагина билиб оламиз. Унгача эса ҳали узоқ йўл босиб ўтилиши лозим.
"Борнмут" - "Манчестер Юнайтед"
Стадион: "Виталити Стэдиум"
Бошланиш вақти: 14.08.2016, 17:30
Бош ҳакам: Андре Марринер
Ўтган мавсум Борнмутда ўтган ўйинда Эдди Хау шогирдлари МЮни 2:1 ҳисобида таслим этишган эди. Ўшанда, Ван Гаал асосий таркибда Варела, Макнейр ва Бортвик-Жексон каби ёш ҳимоячиларни туширган эди. Камтаргина "Борнмут"га ўша натижани такрорлаш жуда қийин бўлади, чунки Моуриньо бошчилигидаги "манкунианликлар" таркибни сезиларли даражада кучайтириб олишди.
Жозе Моуриньо "Манчестер Юнайтед"ни қабул қилиб олгач, кўпчилик "қизил иблислар"нинг аввалги мавқеини тиклаб олишига ишонмоқда. Чунки, Моур деганда кўпчиликнинг кўз олдига ҳар қандай ҳолатда ҳам барчанинг эътиборини ўзига жалб этадиган ва натижа кўрсата оладиган мураббий келади. Ибрагимович, Мхитарян ва Погба "юлдузли" трансферлар бўлди. Эрик Бейи эса қоронғуликдан чиқиб келган "қора марварид" бўлиши кутилмоқда. Ҳар ҳолда, Бейи Англия Суперкубоги учун баҳсда ўзидан илиқ таассурот қолдирди. Табир жоиз бўлса, "Лестер"га қарши таркибдаги энг яхши ҳимоячи бўлди.
"Арсенал" - "Ливерпуль"
Стадион: "Эмирейтс"
Бошланиш вақти: 14.08.2016, 20:00
Бош ҳакам: Майкл Оливер
1-турнинг марказий ўйини, АПЛ мана шунақа дастлабки турданоқ томошабинларни "ўтга ташлайди". Табир жоиз бўлса, чемпионатнинг энг жозибадор ўйин намойиш этадиган клуби энг ҳужумкор жамоага қарши майдонга тушади. Клопп шогирдлари ҳужумкор ўйин намойиш этишади, аммо уларга стабиллик етишмайди. Барча ўйинларда бир текис ҳаракат қила олмаслик уларга узоқ давом этадиган мавсумда панд бериб қўйиши мумкин. Шунинг учун ҳам немис мураббийи ёзги трансфер сиёсатини жуда фаол тарзда ўтказди.
"Арсенал" эса ҳали мавсум бошланмасдан туриб ўз услубига содиқ қолган ҳолда жароҳатлар гирдобига шўнғишни бошлади. Жамоа марказий ҳимоячилари Косельни, Мертасакер ва Габриэллар чемпионат олди ўйинларида жароҳат олишди. Уларнинг ўрнини тўлдириш учун "канонирлар" айни пайтда Шкодран Мустафини сотиб олишга уринишмоқда. Лекин, бу трансфер ҳали "пишмаган". Бундан ташқари, жамоанинг марказий ҳужумида ҳам муаммолар етарли. Афсуски, Венгер марказий ярим ҳимояга Гранит Жакадек ажойиб ўйинчини олди-ю, ҳужумга юқори даражадаги футболчи харид қила олмади. Япониялик Асано эса АПЛ темпини кўтара олишини исботлаши зарур.
"Челси" - "Вест Хэм"
Стадион: "Стэмфорд Бридж"
Бошланиш вақти: 15.08.2016, 23:55
Бош ҳакам: Энтони Тейлор
"Челси" ўтган мавсум амалдаги чемпионлар учун АПЛ тарихидаги энг ёмон натижани қайд этиб берди. Бу мавсум эса Антонио Конте бошқарувни ўз қўлига олди. Италиялик мутахассис ҳимояни "синмас" қилиш билан бирга ҳужумга ҳам катта эътибор қаратади. Унинг ўйини фақатгина ҳимоявий услубга таянмаган. Контенинг жамоалари ҳужумда ҳам қойилмақом ҳаракат қила олади. Мавсум олди ўртоқлик учрашувлари шуни кўрсатдики, Эден Азар клубда яна етакчиликни қўлга олмоқда. Ўтган йилги муваффақиятсиз ҳаракатлар ортда қолгандек кўринмоқда, бу ҳолат "кўклар" мухлисларини фақат ҳурсанд қилади.
Славен Билич бошчилигидаги "Вест Хэм" эса ўтган йили етакчиларнинг роса "қонини ичган" эди. Бу йил ҳам бу ҳолат такрорланмаслигига ҳеч ким кафолат бера олмайди. Лондонликлар таркибларини Андре Айю ва Софиан Фегули каби техникаси кучли футболчилар билан тўлдириб олди.
Премьер лига карвони йўлга чиқмоқда, уни сўнгги бекатга қадар биз билан бирга кузатиб боринг, бундан асло афсусланмайсиз. Раньери, Венгер, Почеттино, Моуриньо, Гвардиола, Конте, Билич, Куман, Маццари каби мураббийлар янги мавсумда АПЛни янада томошабоп қилишлари тайин. Чемпионлик йўлида барча жамоаларга омад тилаб қоламиз.
Толибжон Қосимов
Похожие новости
![AMP Logo](https://championat.asia/image/logo-amp.png)
Комментарии