Андижонда Маражабов хотирасига бағишлаб учрашув ташкил этилди

“Андижанка” жамоаси ташаббуси билан ўтказилган мазкур учрашув Рафаэл Муслимов бошчилик қилаётган футбол мактабининг сунъий майдонида ташкил этилди. У андижонлик марҳум ҳакам Алижон Маражабовнинг хотирасига бағишланди. Ўз вақтида олий лига ва Ўзбекистон кубоги ўйинларида ҳакамлик қилган Маражабовнинг яқинлари ва Андижон фахрийлар жамоаси аъзолари ушбу баҳсга ташриф буюриб, Алижон акани яна бир ёдга олди. 

Маъруф Абдусаломов бошқарувидаги “Андижанка” аёллар жамоаси ҳам ушбу турнирнинг бевосита иштирокчисига айланди. Учрашувда “Андижанка” қизлари “Андижон” фахрийларига қарши баҳс олиб борди. “Андижон” фахрийлар жамоасидан Фарҳод Қодиров, Хайрулло Тожибоев, Ориф Маматказин, Муҳаммаджон Ибрагимов, Рафаэл Муслимов, Шерзод Сўфиев ҳамда Ботир Йўлдошев каби собиқ футболчилар харакат қилишди. Учрашувни таниқли мураббий Валишер Норматов бошқариб борди. Қизиқарли ва муросасиз руҳ остида кечган баҳсда жангавор дуранг - 4:4 ҳисоби қайд этилди.  

Ушбу ўйиндан сўнг “Андижанка” вице-президенти Абдусаломовнинг фикрлари қуйидагича бўлди: - Раҳматли Алижон ака Маражабов ҳаётда ўзидан яхши ном қолдириб кетди. Ҳамма билан бир ҳил самимий муносабатда бўлган. Инсонлийги шахсан менга ёқарди. Ўз ишининг фидоийси эди. Сўнгги пайтларда вилоятнинг фахрийлар жамоасига бошчилик қилиб келаётганди. “Андижон” жамоасида ҳам фаолият бошлаганимдан сўнг иш янада кўпайди. Баъзан вақт камлик қилаётгандек туюлмоқда. Лекин Алижон акани хотирлаб, учрашув ташкил этишни анчадан бери режалаштириб юргандик. Мана бугун насиб қилган экан, ҳаммани бир жойга жамладик. Назаримда бу каби ўйинлар керак. Бошланиши балки бироз кичикроқ ўтгандир. Лекин кейинчалик кенг қамровда ўтказишга харакат қиламиз. Асосийси Алижон ака доимо ёдимизда. Насиб қилса энди “Андижанка” афсонаси Мироман Кимнинг хотирасига бағишлаб ҳам турнир ташкил этишни режалаштиряпмиз. Жамоани узоқ йиллар давомида бошқариб, сезиларли натижаларни қайд этган Мироман Дмитриевичнинг қандай инсон ва мутахассис бўлганини кўпчилик яхши билади. Унинг хотира турнирини кенг миқёсда ўтказишни ўйлаб турибмиз. Бу борада аёллар футбол ассосиацияга мурожаат қилганмиз. Улар ҳам ташкилий жиҳатлар борасида ёрдам беришини билдирган. Қолаверса ушбу турнирга Кимнинг Ҳиндистондаги яқинлари ҳам ташриф буюради. Бунинг устида иш олиб борилмоқда.   

“Андижон” фахрийлар жамоасидан Хайрулло Тожибоев ҳам Алижон Маражабов хусусида фикрларини билдириб ўтди.

- Алижон аканинг қандай инсон бўлганини икки оғиз сўз билан ифодалаш қийин. Барча билан чиқишиб кетарди. Доим қувноқ ва самимий бўлишга интилган. Ажойиб ҳангомалари билан кўпчиликка хуш кайфият улашган. Ўз ишига бўлган садоқати кучли эди. Яратган эгам у кишини ўз раҳматига олсин. Сўнгги пайтларда “Андижон” фахрийлар жамоасига бошчилик қилиб, ҳамма собиқ футболчиларни йиғишга харакат қилган. Ташкилотчи сифатида ҳам кўпчиликка ўрнак бўларди.