Ахбор Имомхўжаев хотира турнири-2025. Мусобақа, жамоалар, гуруҳлар ва яшил майдонга қайтаётган юлдузлар

Футболимиз фидойиси хотирасига бағишлаб мана шундай турнир ўтказиш анъана тусига айланиб бормоқда. 

Унда Ахбор ота ҳаётлик даврида фаолият олиб борган соҳа вакиллари иштирок этгани эътиборга молик.

Сир эмаски, Имомхўжаев мамлакат футболи ривожига катта ҳисса қўшган. У ўз вақтида Ўзбекистон футбол ассоциациясида фаолият олиб борган, футбол ҳакамлигида ўзига хос ютуқларга эришган, Лига учрашувларида комиссар сифатида ишлаган, матбуот, радио, телевидениени бу инсонсиз тасаввур қилиш қийин эди. Қаҳрамонимиз 80 ёшдан ошган вақтида ҳам соғлом турмуш таризини тарғиб қилишда давом этди ҳамда “Тонг” фахрийлар жамоаси сафида ҳафтасига 3 маротаба футбол ўйнарди. Ушбу турнирнинг таг замирида ҳам айнан шу шиор ётади. 

Аввалги турнирлардаги ғолиблар

Дастлаб 2023 йилда ташкил қилинган мусобақа, жорий йилда ҳам давом этади. Одатда 2 июль спорт журналистлари кунига бағишлаб ўтказиладиган мусобақа, расмий ўйинлар, футбол турнирларининг саналаридан келиб чиқиб бу мавсумда куз фаслига кўчирилди. Илк бор ўтказилган мусобақанинг финалида ЎФА ва Сулола жамоалари ўзаро тўқнаш келган ва якунда ассоциация жамоаси 5:2 ҳисобида ғалабани ўзиники қилганди. Учинчи ўрин учун кечган ўйинда "Пахтакор"нинг тажрибали футболчиларидан иборат фахрийлари Championat.asia жамоасидан устун келган, 3:1. Ўтган йилги турнирда ҳам аввалгисининг сценарийси такрорланди. Бош соврин учун кечган беллашувда ЎФА Кун.уздан устун келган, 5:2, бронза медаллари учун жангда яна "шерлар" сайтимиз вакилларини енгган 2:0. 

Бу йилги турнирда кимлар қатнашади?

2025 йилги Ахбор Имомхўжаев хотира турнирида бир қатор янги жамоаларни кузатишимиз мумкин. ЎФФ, ЎФА, "Пахтакор", "Бунёдкор", "Тонг", "Championat.asia", "Марказий сектор", "Олимпия", "Спорт тв", "Спортс.уз", "Сулола", "ЎзПФЛ" жамоалари иштирок этиши кўзда тутилган. Бу йилги асосий янгилик шуки, жамоалар ўз таркибларига икки нафардан юлдуз ва собиқ футболчиларни қўшиб олишга рухсат берилди. Лекин регламентга кўра, у футболчи сўнгги 3 мавсум давомида ҳеч бир жамоа таркибида рўйхатдан ўтган бўлиши керак эмас. "Пахтакор" ва "Бунёдкор" жамоалари собиқ футболчилар билан иштирок этиши туфайли ўйинчи кўпроқни ташкил қилади. Бундай хизматдан фойдаланмаган жамоалар ҳам бор. Қуйида жамоалар таркибидаги машҳур шахсларни келтириб ўтамиз. 

ЎФФ: Нодир Элибоев, Артур Юнусов

ЎФА: Одил Аҳмедов, Тимур Кападзе, Равшан Эрматов

"Пахтакор": Абдукарим Муҳаммедов, Николай Минчев, Рустам Қурбонбоев. Акмал Холматов, Виктор Клишин, Комолиддин Тожиев, Илҳом Суюнов

"Бунёдкор": Ботир Носиров, Мурод Алиев, Суннатилла Мамадалиев, Ғулом Ҳалимтоев, Ислом Иномов, Ғафур Ҳалимтоев

"Championat.asia": Жафар Ирисметов, Воҳид Ҳолбоев

"Олимпия": Руслан Матниязов, Сервер Жепаров, Фарҳод Нишонов, Равшан Хурсанов, Равшан Эрматов

"Спорт тв": Асқар Жадигеров, Зоҳир Пиримов

"Спортс.уз": Ойбек Қиличев

"Сулола": Акмал Шораҳмедов, Азиз Ҳайдаров

"ЎзПФЛ": Анвар Ғофуров, Элёр Узоқов

"Марказий сектор": Даврон Файзиев, Ориф Толипов, Хайрулла Ҳамидов (бош мураббий)

Championat.asia жамоасининг турнир учун таркиби 

Гуруҳ ва учрашувлар тақвими

Жамоалар 2 гуруҳга ажратилган ҳолда бир-бирлари билан куч синашади. Ўйинлар эртадан расман старт олади. Икки гуруҳда ғолиб бўлганлар финалда ўйнаса, иккинчи ўрин эгалари учинчи ўрин учун майдонга чиқади.