Алексей Евстафеев: "Осиё чемпионатига ўз олдимизга максимал вазифаларни қўйган ҳолда кетяпмиз"

Алексей Евстафеев, терма жамоа катта мураббийи: Тайёргарлик кўриш учун жуда кам вақт бўлди. Об-ҳаво ҳам кўнгилдагидек машғулот ўтказишимиз учун имконият бермади. Ўйлайманки, БААдаги бир ҳафталик ўқув-машғулот йиғини чоғида тайёргарликни маромига етказиб оламиз. Таркибдаги футболчиларнинг бари профессионал. Ўз зиммаларига юклатилган масъулиятли вазифани шараф билан уддалашади. Биз мураббийлар йигитларга ишонамиз. Осиё чемпионатига ўз олдимизга максимал вазифаларни қўйган ҳолда кетяпмиз. Мақсадсиз мусобақага бориш бу мантиқсизлик бўларди. Боз устига, таркибимиз жуда кучли. Очиғи, рақибларимиз ҳақида жуда кам маълумотга эгамиз. Шуниси аниқки, улар анчадан бери осиё чемпионатига тайёргарлик кўришяпти. Бундан фаҳмлаш мумкинки, уччала рақибимиз ҳам Уммонга шунчаки қатнашиб кетиш учун келмаяпти.

Камолиддин Алимов.