Александр Крестинин: "Осиё Кубогидаги иштирок Қирғизистон учун катта байрам бўлади"

Чунки ён қўшниларимиз тарихда биринчи бор Осиё чемпионатида иштирок этишади. Кеча Дубайда ташкил қилинган қуръа ташлаш маросимида Қирғизистон терма жамоаси бош мураббийи Александр Крестинин ҳам бор эди. Қуръа натижалари маълум бўлгач, россиялик мураббийни суҳбатга тортдик.  

- Александр Сергеевич, қуръа қандай таассурот қолдирди?
- Ташкилий томонлама ҳам, бошқа жиҳатдан ҳам тадбир юқори савияда бўлди дея оламан. Энг муҳими, ҳамма ўз рақибларини билиб олди ва буёғига тайёргарлик бошланади.

- Қирғизистон жой олган гуруҳ ҳақида нима дея оласиз?
- Оддий гуруҳ эмаслиги кўриниб турибди. Умуман олганда ҳар бир гуруҳ ўзига яраша муракаб. Хитойда дунёнинг энг кучли мураббийларидан бири Марчелло Липпи ишлаяпти. Жанубий Корея эса Осиёнинг етакчи жамоаларидан бири ҳисобланади. Филиппинда америкалик мутахассис ишлаяпти ва уни яқиндан биламан.

- Қирғизистоннинг иштирокидан нималарни кутяпсиз?
- Биз Осиё Кубогида дебютантмиз, яъни тарихда биринчи марта қатнашамиз. Шу боис бошқаларнинг бизга нисбатан қандай муносабатда бўлишини билмайман. Лекин биз ҳам ўзимизни кўрсатишга ҳаракат қиламиз. Осиё Кубогига чиқиш футболчилар учун ҳам, мухлислар учун ҳам катта воқеилик бўлди.

- Терма жамоанинг ҳозирги ҳолати қандай?
- Ўйлайманки, ўйиндан ўйинга ўсиб боряпмиз. Лекин Осиёнинг бошқа жамоалари билан солиштирганда камчиликларимиз кўп. Ҳали Осиё Кубогида шов-шув яратишга ҳаракат қиламиз.

- Ўзбек футболи ҳақида тасаввурингиз қай даражада?
- Бу борада маълумотга эгаман дея оламан. Сизларда футбол савияси анча юқори. Миллий чемпионат ҳам кучли деб биламан.

- Ўзбекистон жой олган гуруҳ ҳақида фикрингиз?
- Япония - кучли, лекин Ўзбекистон ҳам чакки эмас. Менимча, сизнинг жамоангиз бемалол гуруҳдан биринчи ўрин билан чиқа олади.

Х.Холиқов суҳбатлашди.