Zohir Qo'ziboev: “Andijon”ni jamoaviy o'yin evaziga yutdik”

Uchrashuvdagi yagona gol muallifi Zohir Qo'ziboevdan poyoniga etgan o'yin haqida fikrlarini so'radik.

- Jamoangiz uchinchi turga kelib chempionatdagi ilk g'alabasiga erishdi. Avvalo shu “Andijon”ga qarshi kechgan o'yin haqida nima deysiz?
- Nima desam bo'ladi? “Andijon” ham biz ham og'ir vaziyatda edik. SHu bois har ikkala jamoaga ham bugun faqat g'alaba kerak edi. Safarda o'ynashimizga qaramay oldimizga faqat g'alaba qozonish vazifasi qo'yilgandi. Buni bajarish uchun butun jamoa bo'lib oxiriga qadar astoydil kurashdik. Xudoga shukur urinishlarimiz zoe ketmadi. Keyin shuni aytib o'tish kerakki, maydonning xolati talab darajasida bo'lmagani ham biz futbolchilarga qiyinchilik tug'dirdi. Kombinacion o'yin ko'rsatib bo'lmasdi. SHunga qaramay muhimi uch ochkoni qo'lga kiritdik.

- O'tgan yili ham “Mashal” safida “Andijon”ga qarshi o'ynagansiz. Raqib bu safar kuchsiz o'ynadimi yoki “Mashal” kuchli o'ynadimi?
- Yo'q, mezbonlarni kuchsiz deb bo'lmaydi. Ular ham o'z muxlislari qarshisida o'ynab g'alaba qozonish uchun astoydil o'ynadi.

- Birinchi ligada ham o'tgan yili 1:0 hisobida g'alaba bilan qaytgandinglar. Aytingchi bu safar nimani hisobiga g'alaba qozondinglar?
- Bunda murabbiyimizning bergan aniq ko'rsatmalarini to'g'ri bajara olganimizni aytgan bo'lardim. Qolaversa o'zingiz ham ko'rgan bo'lsangiz bizda jamoaviy o'yin yaxshi shakllangan. Uchrashuv so'nggiga qadar barcha g'alaba uchun astoydil mehnat qildi.

- Uchrashuvdan oldin “Andijon” darvozasiga gol urishingizni sezganmidingiz?
- Hujumchi bo'lganim uchun ham har bir bahsda gol urishga harakat qilaman. “Andijon” bilan o'yinda ham gol kiritib, jamoamga g'alaba keltirishni o'ylagandim. Bunda jamoadoshlarimning ham hissa katta deb o'ylayman.

-  Bu yil elitada debyut mavsumingizni o'tkazmoqdasiz. Oliy liga haqida nima deysiz?
- To'g'ri, bungacha asosan birinchi ligada o'ynaganman. Bu yildan boshlab esa oliy ligada o'ynamoqdaman. Bu ligalar o'rtasidagi saviya katta farq qiladi. Albatta oliy ligada aqlli futbol ko'rsatiladi. Uchrashuvlar ham oson bo'lmaydi.

- Ortda qolgan uchta o'yinda hisobingizga ikkita gol yozdirib qo'ydingiz. Mavsum davomida nechta to'p kiritishni rejalashtirgansiz?
- Mavsum avvalida o'z oldimga shaxsiy maqsadlar qo'yganman. Unga ko'ra bu yil ham to'purarlar qatorida yurishga intilaman.

Islombek RUSTAMBEKOV suhbatlashdi.