Jurnalistlar diqqatiga: Bundan buyon "Lokomotiv"ning uy uchrashuvlariga MEDIA TICKET beriladi

Hozirgi zamon futbolini OAVsiz tasavvur qilishning umuman imkoni yo'q. Bugungi kunda tezkor axborot birlamchi bo'lib qoldi. Buning uchun jon koyitib o'zbek futboli rivoji yo'lida samarali mehnat qilayotgan jurnalistlarga alohida minnatdorchilik bildiramiz.

"Lokomotiv" futbol klubi uy uchrashuvlarimizga kelib jamoamiz o'yinini yoritib borayotgan jurnalistlarga yana bir qulaylik yaratib beradi. Bundan buyon "Lokomotiv"ning uy uchrashuvlariga tashrif buyuradigan har bir jurnalistga bittadan "Media ticket" (Matbuot chiptasi) tarqatiladi. "Media ticket" jurnalistga o'yin payti bemalol Media tribunada o'tirib ishlash hamda o'yindan keyingi matbuot anjumaniga kirish huquqini beradi.

To'g'ri, yil boshida OAV xodimlari tegishli joylardan Osiyo chempionlar ligasi hamda O'zbekiston ichki musobaqalari uchun maxsus beyjiklarni olishgan, biroq O'zbekiston Respublikasi IIV qaroriga muvofiq jamoat tadbirlarida chipta sotilishi shart va barcha bunday tadbirlarga, xususan futbol musobaqalariga ham chipta bilan kirishi kerak.

"Lokomotiv" - "Bunyodkor" bahsida bir hamkasbimiz bilan shunday muammo yuzaga keldi va oxir-oqibat chipta olib stadionga kirishga majbur bo'ldi. Biz keyingi o'yinlarda yana shunday muammo yuzaga kelmasligi uchun "Lokomotiv"ning uy uchrashuvlariga tashrif buyuradigan jurnalistlarga "Media ticket" tarqatamiz. Agar qo'lingizda beyjik bo'lsa-yu, ammo "Media ticket" bo'lmasa shunda ham stadionga kirishingiz mumkin, lekin bu Media tribunada o'tirib ishlash imkonini bermaydi. (Qolaversa, stadionimizda OAV xodimlari uchun ajratilgan joy unchalik ko'p emas).

"Media ticket"ni olish tartibi quyidagicha: Buning uchun siz ushbu elektron pochtaga ([email protected]) ism-sharifingiz hamda ish joyingizni yozib yuborishingiz lozim bo'ladi. Elektron pochtaga xat yuborgan OAV xodimi "Lokomotiv"ning uy uchrashuvlariga kelib ishlash uchun tasdiqdan o'tgan hisoblanadi hamda unga "Media ticket" (Matbuot chiptasi) beriladi. "Media ticket" o'z egalariga o'yin kuni taqdim etiladi.

Elektron manzilimiz: [email protected]

Elektron pochtaga xat yuborgan OAV xodimlari ro'yxati o'yin kuni stadionga kiraverishdagi nazoratchi qo'lida bo'ladi. Ro'yxatda ism-familiyasi borlar bemalol "Media ticket" (Matbuot chiptasi)ni olib media tribunada o'tirishlari mumkin.

Izoh: "Lokomotiv" futbol klubi muhri tushirilgan "Media ticket" (Matbuot chiptasi)gina haqiqiy hisoblanadi.


"Lokomotiv" futbol klubi matbuot xizmati.