JCH-2014 ochilish o'yinini qabul qiladigan stadion qisman vayronaga aylandi

Bu haqda Associated Press axborot agentligi xabar bermoqda.

Hodisa natijasida uch kishi halok bo'lgan. Falokat tushlik vaqtida – stadionda odam kam bo'lgan bir fursatda sodir bo'lgan, deya qayd etmoqda agentlik. Boshqa jabrlanuvchilar to'g'risida malumot yo'q.

AP’ning mahalliy telekanallarga asoslanib xabar berishicha, stadionning sharqiy tarafidagi tribunalar buzilib ketgan. Dastlabki malumotlarga ko'ra, qulash metall konstrukciyalarning yuqori qismiga (stadion tomiga) qurilish kranining ag'darilishi natijasida ro'y bergan.

San-Pauludagi stadion, JCH-2014ning boshqa maydonlari kabi, 2013 yil dekabrida foydalanishga topshirilishi kerak edi. Dastlabki reja bo'yicha, ushbu stadion 2013 yilning iyul oyida bo'lib o'tgan Konfederaciyalar Kubogi bahslariga ham mezbonlik qilishi kerak edi, biroq moliyalashtirishdagi uzilishlar sabab qurilish ishlari cho'zilib ketgan edi. Yuz bergan hodisa qurilishni yakunlash bo'yicha yangi sanalarga tasir qiladimi-yo'qmi, bu haqda malumot berilmagan.

Arena de Korintians (FIFA bu stadionni Arena de San-Paulu deb ataydi) JCH-2014ning ochilish o'yini, yarim final bosqichidagi bitta uchrashuv va boshqa bahslarni qabul qilishi rejalashtirilgan edi.

Bu Braziliyaning jahon chempionatini qabul qilishi rejalashtirilgan stadionlarida ro'y berayotgan ilk favqulodda holat emas. 2013 yilning mayida Salvador shahridagi Fonte Nova stadionining tomi kuchli yomg'ir yog'ishi natijasida qulagan edi.

Braziliyadagi jahon chempionatiga tayyorgarlik aholining norozilik namoyishlari fonida davom etmoqda – ko'pchilik, mamlakatda jiddiy ijtimoiy muammolar bo'lishiga qaramay, hukumatning yirik sport musobaqalarini tashkil etishga katta xarajatlar qilayotganidan norozi bo'lmoqda.