JCH-2014. Mundial ishtirokchilari - Urugvay

Bu terma jamoa Jahon chempionatlari tarixida anchagina boy tajribaga ega hisoblanishadi. Urugvay mundialda qay tarzda o'ynash kerakligini juda yaxshi o'zlashtirgan terma jamoalardan sanaladi. Aynan ushbu o'lka vakillari ikki bor Jahonda tengsiz blishga muyassar bo'lishgani ham bejizga emas. SHuningdek, Urugvay 15 karra Amerika chempioni nomiga sazovor bo'lgan yagona jamoa. Urugvay ikki bor olimpiyada g'olibligini ham qo'lga kiritishgan.
Bu terma jamoaning zafarli yurishlari 1920-1950 yillarga to'g'ri keladi. Aynan shu davr mobaynida Urugvay ketma-ket ikki bor Olimpiyada o'yinlari g'olbiga aylanishgan va Jahon chempionligini ham nishonlashga erishishgan.

Urugvay dunyodagi ilk bor terma jamoalar miqiyosidagi barcha yirik musobaqalarda g'alaba qozongan jamoa hisoblanadi. Ular o'z mintaqalarining bir necha karra chempioni, Jahon chempioni va Olimpiya chempioni nomiga sazovor bo'lishgan.

Terma jamoasi safida eng ko'p o'ynagan futbol bu Diego Forlan. Ushbu chart to'p ustasi Urugvay futbolining yorqin futbolchilaridan biri hisoblanadi. Diego Forlan terma jamoa libosida jami 104 o'yinda maydonga tushgan. Urugvayning hozirgi davrining eng kuchli futbolchisi sifatida qaralayotgan Luis Suarez esa qisqa muddat ichida terma jamoa tarkibida eng ko'p gol kiritgan futbolchiga aylanib oldi. Uning hisobida hozircha 38 gol mavjud va Suarez bu ko'rsatkichni hali yana davom ettirishi imkoniyatiga ega.

Oskar Tabares qo'li ostida harakat qilayotgan Urugvay so'nggi paytlarda o'z natijalarini ijobiy tomonga o'zgaritirishga ershishmoqda. Ushbu mutaxassis jamoani 2006 yildan buyon boshqarib kelmoqda. Aynan Tabares jamoani avlodlar almashuvi davrini amalga oshirdi va hozirda ancha shakllanib qolgan jamoani mundialda munosib ishtirok etishini taminlash maqsadida mehnat qilmoqda.

Urugvay terma jamoasining hozirgi tarkibiga nazar tashlaydigan bo'lsak, ko'zimiz bir qator etakchi ijrochilarga tushishi aniq. Jamoa yulduzi bu Luis Suarez. "Liverpul" snayperi ayni paytda jarohatini davolash bilan band va uning safga qaytishi uchinchi turga kelib amalga oshishi kutilmoqda. Hujum chizig'ida yana Diego Forlan va Edison Kavani  singari taniqli nomlar mavjud. Ushbu “trio” bilan Urugvay istalgan raqibni bezovta qila oladi. Oskar Tabares jamoasi “o'lim” guruhidan joy olishgan. Bu guruhga shuningdek, Italiya, Angliya va Kosta-Rika kabi jamoalar bor. Asosiy kurash albatta Italiya, Angliya va Urugvay o'rtasida kechishi aniq. Urugvay o'zining bu tarkibi bilan yuqorida tilga olingan ikkala grand jamoaga etarlicha tashvish tug'dira oladi.  Bu “trio” ichidan Urugvayni aslo autsayder deb bo'lmaydi. “D” guruhi bir-biridan qiziqarli uchrashuvlar bo'lib o'tishi aniq. Tabares jamoasini o'tgan Jahon chempionatining yarim finaliga qadar etib borgandi. Bu safar esa ular qanday natija qayd eta olishlari ko'pchilik uchun qiziq bo'lishi tabiiy. 

Urugvayda barcha chiziqlar tajribali futbolchilar bilan berkitilgan. Darvozada Muslera tursa, himoyada “Atletiko”ning ishonchli qo'rg'oni Diego Godin etakchilik qiladi. Yarim himoyada Arevalo Rios va Valter Gargano boshchilik qilishadi. Hujumda esa kuchli “trio” – Forlan-Kavani-Suarez bor. Bu uchchovlon kerakli paytda bir-birini almashtirib o'ynashlari mumkin.



Urugvay terma jamoasi haqida:

Tashkil topgan yil: 1901

Mintaqasi: Amerika

Bosh murabbiy: Oskar Tabares

Jamoa sardori: Diego Lugano

Eng ko'p o'ynagan futbolchi: Diego Forlan (104 o'yin)

Eng yaxshi to'purar: Luis Suarez (38)

Ilk o'yin: Urugvay - Argentina 2:3

Eng yirik g'alaba: Urugvay - Boliviya 9:0 (1927)

Eng yirik mag'lubiyat: Urugvay - Argentina 0:6 (1902)

FIFA reytingidagi o'rni: 6

Erishgan yutuqlari:

Jahon chempioni: 2 marta (1930, 1950)

Amerika kubogi sohibi: 15 karra chempion (1916, 1917, 1920, 1923, 1924, 1926, 1935, 1942, 1956, 1959, 1967, 1983, 1987, 1995, 2011)

Olimpiada g'olibi: 2 karra chempion (1924, 1928)

Urugvay terma jamoasining yakuniy tarkibi:

Darvozabonlar: Fernando Muslera (Galatasaray, Turciya), Martin Silva (Vasko da Gama, Braziliya), Rodrigo Munos (Libertad, Paragvay).

Himoyachilar: Diego Lugano (Vest Bromvich, Angliya), Diego Godin, Xose Mariya Ximenes (ikkalasi – Atletiko, Ispaniya), Martin Kaseres (Yuventus, Italiya), Maksi Pereyra (Benfika, Portugaliya), Xorxe Fusile (Portu, Portugaliya), Sebastyan Koates (Nasonal, Urugvay).

Yarim himoyachilar: Exidio Arevalo Rios (Moreliya, Meksika), Valter Gargano (Parma, Italiya), Diego Peres (Bolonya, Italiya), Alvaro Gonsales (Lacio, Italiya), Alvaro Pereyra (San Paulu, Braziliya), Kristian Rodriges (Atletiko, Ispaniya), Gaston Ramires (Sautgempton, Angliya), Nikolas Lodeyro (Botafogo, Braziliya).

Hujumchilar: Luis Suares (Liverpul, Angliya), Edinson Kavani (Pari Sen-Jermen, Franciya), Diego Forlan (Sereso Osaka, Yaponiya), Kristian Stuani (Espanol, Ispaniya), Abel Ernandes (Palermo, Italiya).

SHahboz Beg'amov