Jamshid Iskanderov: "CHempionlar ligasida yaxshi natija ko'rsatishga intilamiz"

Ayni paytda terma jamoa yig'inida bo'lgan Jamshid savollarimizga javob qaytardi.

- Mavsum jamoa uchun qanday o'tdi?
- CHempionat juda qiyin kechdi. Har bir jamoaning qarshiligiga duch keldik. O'z navbatida o'yinlarga jiddiy tayyorgarlik ko'rdik. Murabbiylar bilan mashg'ulotlarda qilgan mehnatimiz natijasida chempionlikni qo'lga kiritdik. Avvalgi yildan keyin zafar quchishimiz juda muhim edi. Oldimizga qo'yilgan vazifani uddalay oldik.

- Mavsumni mag'lubiyatsiz tugatish mumkinligi haqida o'ylaganmidingiz?
- Asosiy maqsad har bir uchrashuvda chiroyli futbol ko'rsatib, g'alaba uchun harakat qilish edi. Lekin mavsumni mag'lubiyatsiz tugatamiz deb o'ylamagandim. Futbolchilar murabbiylar tomonidan berilgan ko'rsatmalarni bajarishga intildi va chempionatni ajoyib tarzda yakunladik. Bunda menejerimiz boshchiligidagi murabbiylar shtabi hamda jamoadoshlarimning hissasi katta bo'ldi.

- Qaysi o'yinlar eng og'ir kechdi?
- Men uchun oson uchrashuvning o'zi bo'lmadi. Birinchidan, har bir raqibni jiddiy qabul qilish kerak va o'yinga shunga yarasha tayyorgarlik ko'rish kerak bo'ladi. Ikkinchidan, "Paxtakor"ga qarshi bahslarda hamma o'zining yaxshi taraflarini ko'rsatishni xohlaydi. SHu sababli osonlik bilan yutgan birorta o'yinimiz bo'lmadi.

- 2 yil avval CHempionlar ligasida jamoadagi yosh futbolchilar tajribaga ega bo'lishdi. Jamoa hozir bu turnirda ijobiy natija qayd etishga qodirmi?
- Ha, 2 yil oldin biz muhim tajribaga ega bo'ldik. Endi esa barchamizning niyatimiz CHempionlar ligasida yaxshi o'yin va natija ko'rsatishdir. Biz maydonda qo'limizdan kelgancha harakat qilamiz. Xudo xohlasa, ushbu musobaqada ham muxlislarni xursand etamiz.