Jafar Irismetov: “Tojiev, SHodiev? Yaxshisi murabbiylarning o'zi tanlasin”

SHu munosabat bilan taniqli sobiq hujumchi Jafar Irismetov bilan mazkur uchrashuv haqida suhbatlashdik.

- Jafar aka, o'ylaymizki, kecha MTJmizni o'yinini ko'rgan bo'lsangiz kerak. SHunday bo'lsa, avvalo o'yin haqida fikrlaringizni bildirib o'tsangiz?

- Ha, albatta ko'rdim. O'yin to'g'risida nima desa bo'ladi, bu kabi uchrashuvlar doimo foydalidir. Ayniqsa yosh o'yinchilarni sinab ko'rishda juda asqotadi. Birinchi bo'limda o'yinimiz qovushmagandek tuyuldi nazarimda. Bu narsa ko'proq, yangi qurib borilayotgan tarkib bilan bog'liq bo'lsa kerak. Ikkinchi taymda esa ustunlik to'liq terma jamoamizning tomoniga o'tdi. Yakunda hisob ham shunga yarasha biz uchun qoniqarli yakun topdi.

- Farhod Tojiev va Vohid SHodiev. Kechagi o'yindan kelib chiqib, sobiq hujumchi sifatida aytingchi, Incheonga ularning qay biri borsa ko'proq foydasi tegadi?

- Menga qolsa, ularning ikkisi ham borgani maqul. CHunki bir xil saviyada o'ynashadi.

- Lekin tanlash imkoniyati bitta?

- Nega...?

- CHunki qolgan ikki o'ringa Islom To'xtaxo'jaev bilan Fozil Musaev nomzodi deyarli aniq bo'lib ulgurgan.

- Ha. Unday bo'lsa, tanlash imkoniyatini bosh murabbiyga qo'yib beramiz.

- Baribir bu borada shaxsiy fikringizni aytmadingiz?

- Hozir sizga qaysidir o'yinchini ko'rsatib, ikkinchi o'yinchini ranjitib qo'yishni istamayman. Ularning ikkalasi ham borishga haqli.

- Oliy ligada ulardan boshqa yana qaysi hujumchilarni bu borada ko'rsatgan bo'lardingiz?

- To'g'risi, hozir avvalgidek kuchli hujumchilar kamayib ketgan. Juda ham sanoqli.

- “Mashal” hujumchisi Zohir Qo'ziboevning o'yinini kuzatish imkoni bo'ldimi?

- Yo'q, shu kungacha hech ko'rmadim. Lekin uni gollar urib kelayotganini bilaman.


Islombek Rustambekov suhbatlashdi.