Yuriy Lukin: "Neftchi" tarkibida mahoratli o'yinchilar ko'p"

- “Hokim kubogi” uzoq tarixiga ega bo'lgan turnir hisoblanadi, - deb gap boshladi “Qizilqum” murabbiyi. - Yaxshi eslayman, “Hokim kubogi”da xorijdan ham klublar ishtirok etardi. Bu yilgi turnir ham yuqori saviyada o'tkazildi. Tashkiliy masalalar, mehmonxona, oziq-ovqat,  mashg'ulotlar maydoni va umuman barcha-barchasi ko'ngildagidek tashkillab berildi. Turnir davomida bir-biridan qiziqarli o'yinlarga guvohi bo'ldik.

- Ertangi final borasida nima deysiz?
- “Maydon tekkis to'p yumaloq” deyishadi. Hamma futbolda g'alaba qozonishni istaydi. Ertaga qanday bahs bo'lishini maydondagi o'yin ko'rsatib beradi. Oldindan biron narsa deyish qiyin.  

- Farg'onaliklar haqida fikringiz?
- “Neftchi” jamoasini juda yaxshi bilamiz. Tarixiy jamoa. Faqat so'nggi yillarda qaytadan shakllanmoqda. Tarkibida mahoratli o'yinchilar ko'pligini aytib o'tish joiz.

- “Qizilqum”ning oldiga yangi mavsumda qanday vazifa qo'yildi?
- Finaldan so'ng jamoa Toshkentga yo'l oladi. Poytaxtdagi yig'in yakunlangach, Navoiyga qaytamiz. O'z qarorgohimizga borganimizda rahbariyat bilan bu borada gaplashamiz, - dedi Lukin.

SHuningdek,  jamoa sardori Akmal Rustamov ham final haqida fikr bildirdi.
- Bu yilgi “Hokim kubogi” jamoamiz uchun o'zgacha tayyorgarlik jarayoni bo'ldi. Xar bir bahsga jiddiy yondoshdik. “Neftchi” yaxshi jamoa. Farg'onaliklar o'tgan mavsum barqaror o'yin namoyish etishdi. Fyodorov shogirdlari xar bir bahsda g'alaba uchun o'ynashdi.  Final haqida gapiradigan bo'lsam, albatta biz maydonga g'alaba uchun chiqamiz va kubokni qo'lga kiritishga harakat qilamiz. “Neftchi”ga alohida kutilmagan “sovg'a”miz bor  - dedi “Qizilqum” sardori.

"Neftchi" PFK matbuot xizmati.