Yunusovning goli "Dinamo"ga "Surxon" ustidan g'alaba keltirdi

Joriy mavsumda Pro-Ligadan Superligaga chiqishni maqsad qilgan ushbu jamoalar o'rtasidagi bahs o'rtoqlik maqomida bo'lsada, ancha shiddatli o'tdi.

Uchrashuvning dastlabki daqiqalaridan “Dinamo” maydon markazidagi Azimov-Bozorov- Yunusov-Safarov “kvarteti” evaziga to'pga ko'proq egalik qildi. Tezkor hujumlardan birida termizliklar “Dinamo” safida ko'rikdan o'tayotgan Mirzo Joniqulovni qo'pollik evaziga to'xtatib qolishdi. 31-daqiqada belgilangan 11 metrlik jarima zarbasini tajribali yarimhimoyachi Ilhom Yunusov “Surxon” darvozasiga joyladi, 1:0.

Goldan keyin o'yin davomida samarqandliklarda bo'lgani kabi, surxondaryoliklardan Bahriddin Vahobov, Sardor Eminovlar ham golli vaziyatlar yaratishdi.

Darvoqe, “Dinamo” sobiq hujumchisi Farhod Tojiev ham ayni damda “Surxon” safida bo'lsada, shu kuni “Surxon” bosh murabbiyi Dilshod Nuraliev tajribali Islom Inomov va Farhod Tojievni maydonga tushirmadi, ular alohida shug'ullanishdi.

Har bir bo'limi bir soatdan davom etgan 2 soatlik o'yin yakunida “Dinamo” Ilhom Yunusovning yagona goli evaziga “Surxon” ustidan g'alabaga erishdi.

«Dinamo» safida shu kuni Farrux SHotursunov ham maydonga tushdi.

Qayd etish joiz, “Dinamo” Pro-Liga 2-turi va O'zbekiston Kubogi 1/16 bosqichi doirasida ham aynan “Surxon” jamoasiga qarshi saf tortadi.

O'rtoqlik uchrashuvi. Toshkent.
28 fevral (chorshanba)
«DINAMO» - «SURXON» - 1:0
Gol: Ilhom Yunusov, 31 (pen.).
«Dinamo»: SHohruh Eshbo'taev, Mirkomil Lokaev, Viktor Grigorev, Hakimxon Alamxonov, Aziz Suyunov, Akmal Bozorov, Jasur Azimov, Ilhom Yunusov, Mirzo Joniqulov, Maradona Safarov, Amirjon Safarov.
«Dinamo» (2-bo'lim): Rustam Toshturdiev, Bunyod Isroilov, Firdavs Abdusalimov, Javohir Abduxoliqov (Munir Yusupov), Abdullo Abdulloev (Temur Fayzullaev), Komil SHarofutdinov, Damir Temirov (Farzin Muxtorov), Jasur Qurbonov, Elbek Otaqulov, Jasur Ashurov (Orzu Ahmedov), Farrux SHotursunov (Asomiddin Mamatov).