Yorqin Nazarov: "G'alabani boy berdik"

- O'yin haqidagi fikringiz...

- Guvohi bo'lganingizdek, yigitlar yaxshi kayfiyatda maydonga chiqishdi. G'alaba qozonishga harakat qildik. Birinchi bo'lim to'liq rejamiz ostida o'tdi. SHogirdlarim ko'rsatmalarga amal qilishdi. Gol ham urdik. Ikkinchi bo'limda esa o'z darvozamizdan to'p o'tkazib yubordik. Afsuski, tayyor g'alabani qo'ldan boy berdik. Bir ochko qo'lga kiritgan bo'lsak-da, yigitlarga minnatdorchilik bildiraman. Og'ir sharoitga qaramasdan, maydonga chiqib, ko'rsatmalar asosida o'ynashdi. Bizni qo'llab-quvvatlab turgan muxlislarga ham rahmat aytib qolaman. Hozirgi holatda kelib, moticaviya berayotgan rahbariyatga ham tashakkur izhor qilaman. Endilikda keyingi o'yinga tayyorgarlik ko'ramiz. 

- Ikkinchi davra avvalida SHohmalik Komilov, Fayzullo Jumanqo'zievlar yaxshi taassurot qoldirgandi. So'nggi o'yinlarda esa ular hatto qaydnomaga ham kiritilmayapti. Buning sababi nimada?

- Jamoani yoshartirganmiz. Birinchi davradan so'ng, adashmasam, 9 nafar futbolchiga javob berib yubordik. Jumanqo'ziev avvalgi o'yinda jarohat oldi. Komilov ham oyog'ini qayirib olgan. Bundan tashqari, Abdug'ani Komilov, Sardor Xursandovlar ham shikastlangan. SHu bois, boshqa futbolchilarga tayanishga majburmiz. Qolganlar yo'qotishlarning o'rnini bildirishmadi. Takror aytaman, bugun g'alabani boy berdik. Ikkinchi bo'limda ham qandaydir vaziyatlar bo'ldi. Biroq barchasi hakamlar ko'z o'ngida edi, biz chetda edik. "Metallurg" uchta o'yindan beri yutqazmayotgandi. 

- "Turon"ning Superligada qolish imkoniyati pasaymoqda. Keyingi o'yinlar haqida qanday rejalar bor?

- Murabbiylik postiga kelganimdan beri aytaman, kim bilan o'ynashimizning farqi yo'q. Barcha uchrashuvda g'alabani o'ylashimiz kerak. SHu bois, oxirgi turgacha kurashamiz. Uydami-safardami, faqat g'alaba uchun maydonga tushamiz. Oldinda oltita tur bor. Darajamiz teng jamoalardan ochko olsak, Superligada jon saqlab qolishimiz ham mumkin. O'yindan o'yinga tajribamiz oshmoqda. 

- Qo'l ostingizdagi futbolchilardan keyingi mavsum ham birga ishlashni xohlayotganlaringiz bormi?

- Bor. Olti tur ichida yana ko'zga ko'rinadigan futbolchi paydo bo'lishi mumkin. Hozir hech kim to'g'risida gapirmayman. Barchani baholab boryapmiz. Kelajagi bor yigitlarni jamoada qoldirishga harakat qilamiz. Atrofdagi yoshlarni ham kuzatyapmiz. Yigitlardagi hayajon sekin-sekin yo'qolmoqda. Bugun yutganimizda, intriga saqlanib qolardi, "Buxoro"ni quvib o'tib, "Qizilqum"ga yaqinlashardik. Oldinda olti tur bor. Jamoaga kelganimda, vaziyat og'ir ekanligini bilardim. SHunday bo'lsa-da, ishlayapmiz. Imkoniyat kam deya, to'xtab qolsak, maydonga tushishning hojati yo'q.

- SHogirdlaringiz bugun yaxshi o'yin namoyish etdi. Ularni qanday ruhlantirdingiz?

- Yirik mag'lubiyatdan so'ng ularni o'ziga keltirish qiyin. SHunday bo'lsa-da, imkon boricha ruhlantirdik. Rahbarlar kelib motivaciya berishdi. Yutganimizda yaxshi bo'lardi, lekin bir ochko qo'lga kiritdik. Endi olg'a yurishda davom etamiz.