Xose Mariya Mendez: "CHorak final haqida o'ylamayapmiz, oldinda Livan bilan o'yin bor"

"O'yin juda qiyin bo'ldi. Sababi ikki jamoa bir birini yaxshi biladi. O'yinni analiz qiladigan bo'lsak. O'yinni nazorat qildik. Himoyada juda yaxshi o'ynadik. Qirg'iziston terma jamoasi hujumda u qadar imkoniyatlar paydo bo'lmadi. Faqat o'yin boshida to'p darvoza ustuniga tekkanini hisobga olmasa. Biz esa hujumdagi harakatlarimizni yaxshilashimiz kerak", - deydi murabbiy.

- Birinchi bo'lim o'tgan o'yindagi birinchi bo'limga o'xshash bo'ldi degan fikrga qo'shilasizmi?
- Yo'q. Bunga umuman qo'shilmayman. O'tgan o'yinda juda yomon o'ynagandik. Bugun esa dastlabki 3 daqiqada yomon o'ynadik. Qolgan vaqtda esa yaxshi harakat qildik. Saudiya Arabistoniga qarshi bahsda esa deyarli 20 daqiqa yaxshi o'ynay olmagandik.

- Jamoa chorak finalga chiqib bo'ldi. Livanga qarshi o'yinda asosiy futzalchilarga dam berarsiz?
- Yo'q bunday bo'lmaydi. Biz asosiy tarkib o'yinchilarini maydonga tushiramiz. Bundan tashqari Qirg'iziston va Saudiya Arabistonini ham hurmat qilgan holda o'ynaymiz. Ularning o'rnida biz ham bo'lib qolishimiz mumkin edi.

- O'zbekiston birinchi o'rin bilan chorak finalga chiqib bo'ldi. Narigi guruhda Iroq 90 foizga ikkinchi bo'lishi mumkin. Iroq jamoasi haqida nima deya olasiz?
- Hozircha Iroq haqida o'ylaganim yo'q. Musobaqada kuchsiz jamoa yo'q. Avstraliyami yoki Iroqmi farqi yo'q. CHorak finalda har qanday jamoa Jahon chempionatiga chiqish uchun bor kuchi bilan o'ynaydi. Oldinlari yirik hisoblar ko'p kuzatilardi. Albatta Eron bilan tushib qolishni istamaymiz. Iroq ham kuchli jamoa, ularni ham hurmat qilamiz.

- O'tgan turda CHoriev, bugun uning akasi Rahmatov dublga erishdi. Lekin ular birga bir to'rtlikda o'ynashmayapti? Balki keyingi o'yinda shunday bo'lar?
- Keyingi o'yinga ularning ukasini olib kelamiz (kuladi). Agar jiddiy gapiradigan bo'lsak CHoriev va Rahmatov juda ham boshqa tipdagi futzalchilar.

- Ayni paytda O'zbekiston terma jamoasi haqida o'ylayapsiz. Lekin Evropa chempionatida Ispaniya ham o'ynamoqda. O'sha o'yinlarni ham ko'rayapsizmi?
- Evrofutzalni ko'rayapman. Ispaniyaning o'yinini 5-10 daqiqa ko'rib Qirg'izistonni o'rgandim. Portugaliyaga qarshi o'yinlarni ko'rdim. Balki Ispaniya chempioni bo'lar. Lekin aytganingizdek hozir bor etiborim Osiyo chempionati bilan bog'liq.

- SHuhrat Tojiboev hozir jamoada bo'lganida O'zbekistonni kuchaytirarmidi?
- Albatta tarkibimiz uchun muhim futzalchi edi. Ammo u Osiyo chempionatiga atiga 3 kun qolganida tuzaldi. Osiyo chempionatida 16 nafar o'yinchini ro'yxatdan o'tkazish mumkin bo'lganida uni ham ro'yxatga kiritardik. 

Narzulla Saydullaev