Xose Gomes: "Lokomotiv" bilan fantastik o'yin bo'ldi"

"Bugun fantastik o'yin bo'ldi. Barcha yigitlarim yaxshi o'ynadi. "Al Taavon" bosh murabbiyi sifatida aytadigan bo'lsam OCHLda gol urish qiyin. Odatda safarda 4ta gol urgan jamoa yutadi, ammo bunday bo'lmadi va biroz alam qildi", - deydi Xose Gomes.

- "Istiqlol" - "Al Ahli" uchrashuvini ko'rasizmi? Oxirgi turda nimalar kutayapsiz?

- Barchasini oxirgi tur ko'rsatib beradi. Nima sodir bo'lishi o'yindan o'yinga bog'liq. "Lokomotiv" juda agressiv o'yin namoyish etadigan jamoa, bugun buning guvohiga aylandik.

- "Al Taavon" so'nggi bor 4ta gol urgan o'yinini eslay olasizmi?

- "Al Vahda", "Al Qodisiya", "Al SHabab", "Al Ittihod" bilan o'yinlarda 4tadan gol urganmiz. Menga hujumkor o'yin yoqadi. Gol ursang g'alaba qozonish imkoniyati ko'p bo'ladi.

- SHogirdlaringiz bugun juda erkin tarzda jarima maydoniga yorib kirishdi, zarbdor vaziyatlar ko'p yaratildi. Bugun jamoaingiz mag'lubiyatdan qutulib qoldimi yoki g'alabani boy berdimi?

- Biz bugun 2 ochko yo'qotdik. Qolaversa penaltidan gol ura olmadik. SHu bois 2 ochko yo'qotdik deb aytgan bo'lardim.

- Portugaliyalik murabbiy Saudiya Arabistoni klubiga qanday yangiliklar olib keldi? Jamoa uni qanday qabul qildi?

- Evropa futbolini singdirishga harakat qilayapman. Bunda menga tashkiliy ishlar kerak. Futbolchilarga erkin fikrlash va xotirjamlikni o'rgatmoqchiman.

- "Lokomotiv"dan qaysi futbolchini alohida ko'rsatgan bo'lardingiz?

- O'yin paytida o'z jamoam futbolchilariga qaratdim. SHu bois sizning savolingizga javob bera olmayman. Balki o'yinni qayta ko'rib chiqqandan so'ng qaysidir futbolchini ajratib ko'rsata olarman.

- Jamoa safardami yoki uydami 4ta gol ursayu yuta olmasa... buni murabbiy sifatida qanday tushuntirib berasiz?

- Men faqat natijadan xafaman. Lekin o'yinchilarimning harakatidan emas, biz himoyadagi muammolarni bartaraf etib hujumni kamida hozirgidek saqlab qolish kerak.

Narzulla Saydullaev yozib oldi