"Vodiy futboli": 17-turda ikkita g'alaba va ikkita mag'lubiyat

"Andijon": "Mashal" mag'lub etildi

Oliy liganing 17-turida "burgutlar" Muborakning "Mashal" klubini qabul qildi. O'yin taqdirini ikkinchi bo'limda Iqbol Boboxonovning penaltidan urgan goli hal qildi - 1:0.

"Andijon" 4 o'yinlik mag'lubiyatli seriyadan so'ng g'alaba qozonib o'z ochkolarini 14taga etkazib oldi. Jamoa 13-pog'onada bormoqda.


"Navbahor": Bekoboddan g'alaba bilan

Baxtiyor Ashurmatov boshchiligidagi "Navbahor" klubi Bekobodda "Metallurg" klubi mehmoni bo'ldi. Uchrashuvda "lochinlar" 3:2 hisobida zafar quchishdi.

Qahramon Muhammadjonov, Dilshod Jabborov va SHahboz Erkinov tomonidan urilgan gollar "Navbahor"ga g'alaba keltirdi. Jamoa 22 ochko bilan musobaqa jadvalining 8-o'riniga chiqib oldi.

"Qo'qon-1912": Toshkentda yirik mag'lubiyatga uchradik

"Paxtakor" mehmoni bo'lgan qo'qonliklar chempionga 1:4 hisobida yutqazib qo'yishdi.

Vodiy klubi safida yagona javob to'pini ikkinchi davra boshida yana jamoaga qaytgan Otabek Haydarov kiritdi.

"Qo'qon-1912" 14 ochko bilan musobaqa jadvalining 14-pog'onasida bormoqda.


"Neftchi": "Lokomotiv"ga yutqazdik

Murod Ismoilov boshchiligidagi "Neftchi" ketma-ket ikkinchi o'yinda ham mag'lub bo'lishdi. Ikkinchi davrani G'uzordagi yirik mag'lubiyat bilan boshlagan farg'onaliklar bu safar "Lokomotiv"ga yutqazib qo'yishdi - 1:2.

Murod Bobojonovning bitta goli jamoani mag'lubiyatdan qutqarib qola olmadi.

Uch o'yindan buyon yuta olmayotgan "Neftchi" 33 ochko bilan 5-o'ringa tushib qoldi.