Viktor Jalilov: "Ikki jamoa ham g'alabaga munosib edi, deya olmayman"

"O'ylashimcha, hisob o'yinga mos bo'ldi. Hech bir jamoa g'alabaga munosib edi, deya olmayman. Golli vaziyatlar ko'p bo'lmadi. Bunday uchrashuvlarda barchasini yagona gol hal qiladi. Bizda ham, AGMKda ham to'p nazoratiga egalik kuzatildi. Hujumlar, qarshi hujumlar uyushtirishga intilish bo'ldi.

Hujumga etibor qaratishga intilyapmiz, lekin ko'p narsa futbolchilarning mahoratiga, raqibning qarshiligiga ham bog'liq. Qolaversa, AGMK ham kuchli jamoa, bejiz turnir jadvalining yuqori o'rinlarida bormayapti. To'g'ri, hujumda muammolarimiz bor, hujumlarimiz yakuniga etmay qolyapti. Lekin baribir, asta-sekin hujumdagi salohiyatimizni oshirib boryapmiz. Hali oldinda ko'p o'yinlar bor. Golban haqida biror narsa, deya olmayman, barchasi tekshiruvlardan keyin aniq bo'ladi. Hammasi shifokorlarga bog'liq.

Bizda hech kim atayin himoyadan o'ynashni xohlamaydi. Barchasi tarkibda qanday futbolchilar borligiga bog'liq. Yigitlarni ranjitmoqchi emasman, ammo ayrim jihatlar bo'yicha aksariyat futbolchilarimizga mahorat etishmayapti. SHu bois jamoamizdan O'zbekiston termasida futbolchi yo'q. Hujumdagi futbolchilarimiz terma darajasiga tortadigan o'yin ko'rsatishmayapti. O'ylashimcha, ular hali o'z mahoratlarini ko'rsatishadi. Misol uchun, O'rinboev birinchi davradagiga nisbatan o'yinini ancha o'nglab oldi", – deydi Viktor Jalilov.