Uni tanidingizmi loyihasidagi suratning javobi (izoh bilan)

Bir soat oldin saytimiz orqali mashhur futbolchilardan birining suratini joylab, uni kimligi haqidagi savolni o'rtaga tashlagan edik.

Bu borada siz azizlar tomonidan bir qancha javoblar yozildi. Ko'pchilik muxlislarimiz ushbu savolga to'g'ri javob topishgan.
Birinchi bo'lib ushbu bolakayning Stiven Jerrard ekanligini "dinamo-8080" nomli muxlisimiz topdilar.

Ko'pchilikda "Liverpul"ning ko'p yillik sodiq futbolchisi nima uchun "Everton" futbolkasida suratga tushganligi haqida savol uyg'ondi. Bir paytlar Stivning o'zi ushbu rasmga izoh berib o'tgan. Uning gaplarini keltirib o'tamiz: 

"Internetni titkilab turib, mening "Everton" libosida tushgan suratimga ko'zingiz tushib qolishi mumkin. Ko'k libos, shortik, getrilaman. Men "Liverpul"da mashhurlikka erishishni boshlagan vaqlarimda "Everton" fanatlari ushbu rasmni chop etib, tarqata boshlaganlar. Bu ish ular uchun qiziqarli tuyulgan. Hattoki The Mirror nashri ham ushbu suratn chop etgan va darhol ushbu suratning haqiqiy yoki fotomontajligi haqida savollar uyg'ona boshlagan. Ko'plar buni "fotoshop" deb o'ylaydilar. Aslida u rasm haqiqiy. Ushbu suratga 1987 yili tushganman. Menin ushbu "Everton"chasiga tushgan suratimda olti yosh bo'lganman. O'shanda amakim Lesli meni "Everton"ning o'yiniga olib borgan. Ushbu o'yinda men lotoreya g'olibi bo'lganman. G'olibning sovrini esa "Everton"ning sovrinlari bilan suratga tushish bo'lgan.

Amakim esa ayyorona tabassum qilib qo'ydi. CHunki, ushbu holat dadamning jahliga sabab bo'lardi. SHunday ham bo'ldi. U shundan so'ng meni amakim bilan futbolga yubormaydigan bo'ldi.

Men o'sha vaqtda judayam yosh bo'lganman. Ushbu ikki jamoa o'rtasidagi raqobatning qay darajada ekanligini tushunib etmaganman. Men esa suratga tushishni judayam istagandim. Bu men uchun oddiy hol edi.

Hozirda esa ushbu suratni ko'rib o'zimga o'zim aytaman: "O'shanda nima qilib qo'yganman-a? Haaa... Barchamiz xatoga yo'l qo'yamiz. Buni bolalikka yo'yib qo'ya qolamiz", - deydi futbolchi.

Aziz To'xtamurodov tayyorladi