Ulug'bek Ro'zimov: “Har qanday musobaqaning ilk uchrashuvi qiyin bo'ladi”

KXDRga qarshi o'yin oldidan o'z vaqtida milliy terma jamoamiz libosida o'ynagan sobiq futbolchi, Ulug'bek Ro'zimovga murojaat qildik.

- Ulug'bek aka, Avstraliyada start olgan Osiyo Kubogida terma jamoamiz bugun guruhdagi ilk uchrashuvini o'tkazadi. Mazkur o'yin oldidan fikringiz qanday?
- Hozircha bu haqda bir nima deyish qiyin menga. Birinchi o'yindan keyingina xulosa qilsa bo'ladi. CHunki men MTJni bitta sinov nazorat o'yinini ko'rdim. SHuning uchun to'liq tasavvurga ega emasman. Jiddiy bir fikr bildirgani ham qiynalaman. Lekin shuni unutmaslik kerakki, har qanday musobaqada birinchi o'yin murakkab bo'ladi.

- Raqib jamoa KXDR haqida ham aytarli malumotga ega bo'lmasangiz kerak. Lekin qanday hisobni kutyapsiz?
- Albatta O'zbekiston milliy terma jamoasini g'alaba qozonishini istayman. Axir xalqimiz shuni kutyapti. Boz ustiga birinchi turdagi ijobiy natija keyingi o'yinlarda yigitlarga ruhan yaxshi tasir o'tkazadi. SHuning uchun Yaratgandan faqat va faqat g'alaba so'raymiz.

- CHempionat favoritlari deya kimlarni ko'ryapsiz?
- Men sizga aytsam, Osiyo chempionatiga kuchsiz jamoa bormaydi. Birortasini kuchli yoki aksincha deb bo'lmaydi. Futbolchilar ham shuni xis etish kerak. Raqibni mensimaslik yomon xolatlarga olib kelishini tushunish lozim. SHu bois har bir bahsga jiddiy qarash joiz. Aniq nomlarga keladigan bo'lsak, bu borada 4ta terma jamoani ko'rsatib o'tishim mumkin. Bular: tabiiyki o'z-o'zidan birinchi o'rinda O'zbekistondan degan bo'lardim. Keyin Avstarliya, Yaponiya, Janubiy Koreyadan ham ko'p narsa kutsa bo'ladi. Saudiya Arabistoni ham kuchayib bormoqda. Balki ular ham favoritlarga jiddiy tashvish tug'dirar.

Islombek Rustambekov suhbatlashdi.