U-20 yoshlar o'rtasidagi JCH: Guruhdagi raqiblarning tayyorgarligi haqida

Quraga ko'ra, O'zbekiston U-20 yoshlar terma jamoasi musobaqaning F guruhida Germaniya, Gonduras hamda Fidji terma jamoalariga qarshi bahs olib boradi.

Ravshan Haydarov bosh murabbiyligidagi O'zbekiston yoshlar terma jamoasi jahon chempionati bahslariga tayyorgarlikni boshlab yuborgan. Terma jamoa fevral oyida Turkiyada o'quv yig'inini o'tkazdi va bir qator o'rtoqlik uchrashuvlarida maydonga tushdi. Mart oyida esa Ravshan Haydarov jamoasi Portugaliyada yig'in o'tkazishi va bu yig'in davomida Portugaliya hamda Urugvay yoshlar terma jamoalariga qarshi o'rtoqlik uchrashuvlarida maydonga tushishi haqida avvlroq xabar berilgan edi. SHuningdek, aprel oyida Toshkentga Jahon chempionati mezboni - Yangi Zelandiya terma jamoasi tashrif buyurishi rejalashtirilgan.

Takidlash lozim, O'zbekiston terma jamoasining Jahon chempionati guruh bosqichidagi raqiblari ham turnirga tayyorgarlikni boshlashdi. Jumladan, Germaniya U-20 yoshlar terma jamoasi mart oyida ikkita, aprel oyida esa bitta o'rtoqlik uchrashuvini o'tkazadi. Unga ko'ra, Germaniya yoshlari 27 mart kuni Polsha, 31 mart kuni esa CHexiya yoshlariga qarshi o'rtoqlik o'yinlarini o'tkazsa, 21 aprel kuni Italiyaga qarshi maydonga tushadilar.

Guruh bosqichidagi yana bir raqib - Fidji yoshlar terma jamoasi ham musobaqaga tayyorgarlikni boshlab yuborgan. Okeaniya qitasi vakillari hozirgacha to'rtta o'rtoqlik uchrashuvini o'tkazishdi. Qayd etish joiz, ushbu o'rtoqlik uchrashuvlarining barchasi Osiyo qitasi jamoalariga qarshi o'tkazildi. Dastlab, Fidji terma jamoasi U-20 yoshlar o'rtasidagi Jahon chempionatining yana bir ishtirokchisi - Myanma U-20 yoshlariga qarshi uch marotaba maydonga tushishdi. Mazkur uchta o'yinning ikkitasida Myanma yoshlari g'alaba qozonishdi - 1:0 hamda 3:0. Terma jamoalarning yana bir o'yinida esa hisob ochilmadi - 0:0. Fidji yoshlar terma jamoasi shuningdek, Malayziya U-22 terma jamoasiga qarshi maydonga tushdi va bu uchrashuv Fidji yoshlarining 1:0 hisobidagi g'alabasi bilan tugadi.

Guruh bosqichidagi so'nggi raqib - Gonduras terma jamoasi esa JCH bahslariga tayyorgarlikni mart oyida boshlaydi. Gonduras Futbol Federaciya xabariga ko'ra, terma jamoa aprel oyida Janubiy Amerika qitasi bo'ylab turne uyushtiradi va mazkur turne davomida 10tadan ko'p o'rtoqlik uchrashuvlarida maydonga tushishni rejalashtirgan.

Eslatib o'tamiz, U-20 yoshlar o'rtasidagi jahon chempionati bahslari 30 may kuni start oladi.