U-20 JCH. Braziliyaliklar to'pdan shikoyat qilishmoqda

Ertaga yoshlar o'rtasidagi jahon chempionati start oladi. Mazkur musobaqa oldidan jamoalar so'nggi tayyorgarlik mashg'ulotlarini olib borishmoqda. SHular qatorida, mundialga hozirlik ko'rayotgan braziliyaliklar musobaqada foydalaniladigan to'plardan shikoyat qilishdi.

Jumladan, "Vasko da Gama" yarim himoyachisi Marlon Gomesh shunday dedi: "Musobaqada foydalaniladigan to'p qandaydir boshqacha ko'rinishda, u darhol tezlik olib ketadi, aylanish jihatdan ham farqlanadi. SHunga qaramay, biz bunga moslashayapmiz va bor etiborimizni Italiyaga qarshi o'yinga qaratyapmiz".

SHuningdek, "Korintians" hujumchisi Pedrino ham Gomeshning fikriga qo'shimcha qildi: "To'p boshqacha, ammo vaqt o'tishi bilan bunga ko'nikib ketamiz".

Eslatib o'tamiz, 20 yoshgacha bo'lgan futbolchilar o'rtasidagi jahon chempionatida foydalaniladigan to'pning nomi OCEAUNZ bo'lib, Adidas kompaniyasi mazkur koptokni ayollar o'rtasidagi jahon chempionati uchun ishlab chiqargandi, ammo mazkur musobaqada ham ushbu to'pdan foydalaniladigan bo'ldi.

Ushbu to'pda ham Qatardagi jahon chempionatida bo'lgani singari ofsaydni aniqlaydigan yarimavtomat tizim mavjud.

Braziliya yoshlar terma jamoasi jahon chempionatining "D" guruhida Italiya, Nigeriya va Dominikan bilan to'qnash keladi.