Timur Kapadze: "Muxlislarning noroziligini tushunaman"

Biz Timur Tohirovichga murojaat qilib uning fikrlari bilan qiziqdik.

"Birinchi navbatda murabbiylar shtabini tuzishim kerak. Undan keyin mart oyida bo'ladigan Senegal va Marokash bilan o'rtoqlik uchrashuvlari uchun futbolchilarning kengaytirilgan ro'yxatini taqdim etishim kerak.

Terma jamoaga vaqtinchalik bosh murabbiy bo'lganim elon qilinganidan so'ng muxlislar tomonidan etirozlar bo'ldi. Bu holatda muxlislar norozilik bildirishgani tushunaman, lekin bu men uchun ham kutilmagan va qanday masuliyatli lavozim bo'lganini bilaman.

Meni chaqirib shu lavozimni vaqtinchalik senga topshirishni maqul ko'rdik, deyishganda, men ham o'z fikrimni bildirib, boshqa murabbiyni qo'yishlarini aytdim. CHunki, bizda bunga loyiq murabbiylarimiz bor deganimda, hozirgi kunda Superliga jamoalaridan murabbiylarni MTJga vaqtinchalik taklif qilish to'g'ri bo'lmasligini aytishdi. Ular o'z jamoalarini chempionatga yaxshi tayyorlab, bor etiborlarini o'z klublariga qaratishishlarini maqul ko'rdik. Senga kelsak, hozirda shu uchta o'yinga o'zing MTJni tayyorlaysan va keyinchalik xorijlik mutaxassis kelganidan so'ng, o'zing unga maslahatchi, yordamchi murabbiy bo'lib qaysi futbolchi nimalarga qodirligini, qaysi ampluada harakatlanishini tushuntirib yordam berasan. Va albata yonida yurib o'zing ham malakangni oshirasan. Keyinchalik bu yaxshi mutaxassis bo'lishingda yordam bo'ladi, deyishdi.

Menga omad tilagan holda ishni boshlashimni aytishdi. Menga ishonib, shunday masuliyatli lavozimga munosib ko'rishganligi uchun o'z navbatida O'FF prezidenti Ramatov Achilbay Jumaniyazovichga va birinchi vice-prezident Umid Ahmadjonovga minnatdorchilik bildiraman.

Nasib qilsa qo'limdan kelganicha terma jamoamiz manfaati uchun jonimni berib ishlayman. Menga berilgan ishonchni oqlashga harakat qilaman. Men uchun milliy terma jamoamiz har doim barcha narsadan ustun turgan. O'zbek futboliga har taraflama toza, pok,  yaxshi xizmat qilishda davom etaman. Milliy terma jamoaga kimlarni jalb qilganimni kengaytirilgan tarkib chiqqanidan so'ng bilib olasizlar, - deydi O'zbekiston terma jamoasi vaqtinchalik bosh murabbiyi Timur Kapadze.

Jahongir Sotvoldiev suhbatlashdi