Timur Kapadze: "CAFA - yaxshi turnir bo'ladi. Hali shartnomam yangilanmadi"

"O'ylaymanki, CAFA - yaxshi turnir bo'ladi. Ikki yil avval ham yurtimizda o'tkazilgan edi. Bu safar esa O'mon va Malayziya terma jamoalari musobaqaga qo'shilishdi. Tayyorgarlik uchun yaxshi imkoniyat bo'ladi. Yangi futbolchilarni sinab olish imkoniyatimiz bo'ladi. Musobaqa zich taqvimga ega va FIFA kunlaridan oldinroq boshlanadi. Legionerlar birinchi uchrashuvga etib kelishi biroz qiyinchilik tug'dirishi mumkin. Tayyorgarlik ko'rish uchun hali vaqtimiz bor. Hozir o'yinlarni kuzatib boryapman, kim qanday o'ynamoqda va kimni terma jamoaga chaqirish mumkin. Asosiysi futbolchilarimiz jarohatlarsiz bo'lishi" - deya fikr bildirdi Timur Kapadze bo'lajak musobaqa haqida.

- Yangi futbolchilarni sinab ko'rish uchun yaxshi imkoniyat bo'ladi dedingiz. MTJ qishda Doxada o'tkazgan yig'ini kabi CAFA musobaqasiga faqatgina Superligada to'p tepayotgan futbolchilar jalb etilishi mumkinmi?

- O'zini ko'rsatgan futbolchilar albatta jalb etiladi. Musobaqa yaqinlashib qolgan vaqtda barchasi aniq bo'lib qoladi. Bunga qadar terma jamoaga jalb etilmagan futbolchilarni chaqirishimiz mumkin bo'ladi. Yangi futbolchilarni sinab ko'rish, ular terma jamoada qanday o'yin namoyish etishini bilib olamiz.

- Qatarga qarshi o'yindan so'ng shartnomam noyabr oyiga qadar mo'ljallangan degan edingiz. Yangi shartnoma haqida O'FA bilan muzokara olib bormadingizmi? Balki shartnomani uzaytirib bo'lgandirsiz?

- Yo'q, hali shartnomam yangilanmadi. Menimcha, butun shtabning shartnomasi noyabrga qadar amal qiladi. Hali vaqtimiz bor, shoshilmayapmiz. Bu chuqur detallarga boy masala bo'lgani sababli, ular ham shoshilmayapti. 

Abdulvosit Bektemirov suhbatlashdi