Жамоани мавсум бошида сербиялик мутахассис Милан Миланович қабул қилиб олган эди. Мураббий ўзининг дебют мавсумидаёқ мамлакат кубогини “Хўжанд” билан боши узра баланд кўтарди. Маълумот учун, Миланович фаолияти давомида Қозоғистоннинг “Иртиш”, “Тобол” жамоаларини бошқарган.
— "Хўжанд" билан Тожикистон Кубогида зафар қучдингиз. Бунинг қўлга киритилиши, унгача босиб ўтилган йўл ҳақида гапириб берсангиз…
— "Хўжанд" билан Тожикистон Кубогида ғолиб чиқдик. Бундан жуда хурсандман. Соврин учун кўп меҳнат қилдик, ишладик. Тошкентда ўтган йиғинларда жамоанинг камчиликларини кўриб олгандим. Вақт ўтгани сари хатолар бартараф этиб борилди. Якунда кубок ютдик. Мураббий сифатида бу совриннинг мен учун аҳамияти катта.
— Тожикистон футболи, клуб қандай мураккабликлар билан сизни қарши олди?
— Чемпионат узоқ давом этарди, осон бўлмаган йўл бор эди. Мавсумнинг стартида яхши ўйнадик, кейин эса кетма-кет 3 та ўйинда мағлуб бўлдик. Ёзги танаффусдан сўнг натижаларимиз яхшиланди. Жамоани йиғинларда янгидан шакллантиришга тўғри келди. Ўтган йилгидан кам футболчи қолганди. Ҳозирга келиб натижаларимиз яхши. Тожикистон Кубогида "Истиқлол"ни турнирдан чиқариб юбордик. "Равшан"ни енгдик. "Вахш" ҳам яхши ўйин ўтказди. Кўряпсизки финалгача яхши жамоалар синовидан ўтдик. Ҳа, стадионларда мухлислар кўп. Улар ўз жамоаларини яхши кўришади. Майдондан ташқарида ҳам қўллашади. Уларга хурсандчилик улашганимиздан хурсандман.
— "Тобол" билан Еврокубокларга йўлланмани қўлга киритган эдингиз. Костанайликлардан қолган хотиралар билан ўртоқлашсангиз…
— "Тобол"ни яхши хотиралар билан эслайман. Костанай ҳокими футболни яхши кўрарди. Менга ўйинчиларнинг сифати манзур келганди, очиғи ижобий маънода хайратланган эдим. Жамоада терма жамоа аъзолари, легионерлардан таниқли Зоран Тошич бор эди. У ЦСКА, "Манчестер Юнайтед"да ўйнаган. Уларнинг профессионаллиги ёққан. Мен қандай ўйин истаётганимни тезда тушуниб олишган.
— Ўз вақтида "Тобол"да ўзбекистонлик ҳужумчи Игорь Сергеев билан ишлагансиз. Игорь Сергеевнинг қайси сифатларини алоҳида кўрсата оласиз?
— Игорь Сергеевни биринчи ўринда инсонийлик сифатларини эътироф этаман. Инсон сифатида менга манзур келган, жуда хотиржам ва ишига профессионал. Игорь жарима майдончаси ичи қироли. Жамоанинг ҳужумларига ажойиб якун ясай олади. Ярим ҳимоячилар унга кўпроқ узатма берарди. Чап оёқ ва бош билан дарвозага ажойиб зарба бера олади. "Тобол"да жисмоний ҳолати ҳам зўр эди. Сергеев жуда тарбияли йигит.
— Сиз ва бошқа европалик мутахассисларга Марказий Осиё жамоаларига, менталитетга мослашиш қанча вақт талаб қилади? Нимаси кўпроқ ўзига тортади?
— Ҳа, Марказий Осиё мамлакатларида яхши маош тўлашади. Бу мутлақо тўғри. Бундан ташқари менга Қозоғистон, Тожикистон, Ўзбекистон чемпионатлари қизиқ туюлган. Мен маҳаллий мухлисларни ҳурмат қиламан. Маҳаллий футболчиларга нимадир ўргатишни истайман. "Хўжанд"да ҳам, Қозоғистонда ҳам ҳурмат қозонишга ҳаракат қилганман.
— "Тобол"даги фаолиятингиздан сўнг Ўзбекистон клубларидан қизиқиш бўлган экан...
— Ўзбекистондан таклифлар бўлмаган, лекин доим катта қизиқиш билан кўраман. Чунки қўл остимда аввал ўйнаган Черан, Станоевич, Бубаня бор. Черан ва Маркога ўз отасидек бўлиб қолганман, чунки биз кўп гаплашамиз. Бу футболчиларни 3 та жамоада шуғуллантирганман. Кейинчалик улар Ўзбекистон, ОЧЛ да муносиб ўйнашди ва ўйнамоқда. Мамлакат чемпиони, тўпурарига айланишди. Ҳозир Сербияда ҳам Ўзбекистон чемпионатини кузатиш мумкин. Ўзбекистон клублари билан танишман, терма жамоангиз Жаҳон чемпионатида қатнашди. Бундан хурсанд бўлдим. Йиғинлар давомида бир нечта стадионларни кўрдим, у ерларда тезкор ва ёш футболчилар шуғулланишмоқда. Улар ҳақиқий футбол ўйнашмоқда.
— Тожикистон футболининг ривожланиш, салоҳиятига қандай баҳо берасиз? Имкониятларни қандай баҳолайсиз?
— Тожикистон футболининг кучайиши кўпроқ структурага боғлиқ. Клублар структураси яхшиланса, натижалар ҳам яхшиланади. Ёш футболчиларга имконият бериш керак. Легионерларга боғланиб қолиш ҳам бор, уларни сифатлисини олиш талаб этилади.
