Timur Kapadze: "Bu g'alaba hammamizniki"

- Hudoga shukur, uzoq yo'l bosib kelib, muhim natijani qo'lga kiritdik. Butun xalqimizni, Yurtboshimizni tabriklaymiz. Bu g'alaba hammamizniki. Kecha, bugun telefon tingani yo'q, hamma bizni qo'llab-quvvatlashini, duo qilishini aytdi, g'alaba tilaklari biz uchun juda katta ishtiyoq bo'ldi. Futbolchilarim har bir o'yinda iroda ko'rsatishdi, maksimal harakat qilishdi, shu sababli natijaga erishdik. Hammamizga bu kun muborak bo'lsin. Bizga ham ozgina etishmasdi, hech bo'lmasa muzqaymoq eb kelishni istardik. Shukur, mana biz jahon chempionatiga chiqdik, xalqimiz borib, bemalol muzqaymoq eydi. 

- Qaysining bosimi kattaroq bo'ldi: Olimpiadaga olib chiqqan o'yinmi yoki bugungisi?

- Baribir olimpiya termasi milliy termadan bitta pog'ona pastda. Lekin o'sha o'yinning ham bosimi katta edi. Milliy terma mamlakatning eng katta jamoasi, demak, masuliyat ham shunga yarasha.

- Terma jamoani shunday paytda qo'lingizga olishingizning o'zi ham katta risk edi.

- Peshonada bor ekan. Shu kun menga nasib qildi. Hudoga shukur qilaman. Olimpiada chiqqanimizda ham o'z yo'limdan borganman. 

- Endi Qatarga qarshi bahs katta bayramga aylanadi.

- Albatta, bu o'yinga tayyorgarlik ko'ramiz.

- Kam o'ynaganlarga imkoniyat berasizmi?

- Ko'ramiz, jamoaning kayfiyatiga qaraymiz. Hozir bu haqida gapirish juda qiyin. Hozir futbolchilarda kayfiyat ancha yuqori. Buni erta-indin o'ylab ko'ramiz. Chunki o'sha payt hissiyotlar kamroq bo'ladi va yaxshiroq o'ylash mumkin bo'ladi. 

- O'zingizdan qanchalik masuliyat echildi?

- Katta bosimni engib o'tdik. O'yindan oldin barcha saytlar, muxlislar g'alabamizni taxmin qilishdi. Bu ishtiyoq bo'lgani bilan katta yuk ham. Buni oqlashimiz kerak edi, bosim bor edi va vazifani uddaladik.