Timur Kapadze: "Bizning o'yinchilar raqibdan har taraflama kuchli edi"

- O'yin haqida fikringiz qanday? Ko'pchilik yirik hisobdagi g'alabani kutgandi. SHunday ham bo'ldi...

- G'alaba bilan hammani tabriklayman. Sizga balki kutilgan g'alabadir, ammo biz tayyorgarlik ko'rdik. Albatta, Afg'oniston terma jamoasi haqida malumot to'plashga harakat qildik, ammo buning iloji bo'lmadi. O'yindan oldin bu jamoaning o'yinlari bizga qorong'u edi. Ular yaxshi kurashishdi. Bizning o'yinchilar raqibdan har taraflama kuchli edi. O'yin ham buni isbotladi. Keyingi o'yinlarga tayyorgarlik ko'ramiz.

- Eron va Gonkong o'rtasidagi o'yinni ko'rishga ulgurdingizmi?

- Yo'q, ammo yordamchilarim bu o'yinni kuzatishdi. Uchrashuvning video tasvirlarini ko'rib chiqamiz. Ularning oldingi o'yinlarini ko'rganmiz. Bu uchrashuvga to'g'ri tayyorgarlik ko'ramiz. Ikkala raqib ham kuchli jamoa.

- Eron termasi vakillari o'yinni kuzatib borishdi, videoyozuvlarga ham muhrlashdi. Eronliklarni o'zaro uchrashuvda qanday xayron qoldirmoqchisiz?

- Ikki jamoa ham bir-birini o'rganadi. Bu tushunarli holat. Bizning murabbiylar ham ularning o'yinlarini tomosha qilishdi. Bu masalaga o'zaro o'yindan biroz avval qaytamiz. Hozir Gonkongga qarshi o'yinga bor etiborimizni qaratamiz. Eron albatta kuchli jamoa. Ko'ramiz, hamma salomat bo'lsa, asosiychi shu.

- Birinchi bo'limda jamoa xotirjamlikka berildi. Himoyada ham xatolar kuzatildi. Bunga sabab nima bo'ldi?

- Xotirjamlik demagan bo'lardim. Birinchi o'yin bo'lganligi sabab hayajon bor edi. Boshida shunday bo'lish ehtimoli bor edi, ammo baribir yaxshi harakat qildik, deb o'ylayman. Xatolar ham bor, ularni o'rganib chiqamiz.

- Terma jamoa tarkibidagi o'yinchilar juda yaxshi daraja. Keyingi o'yinlarda tarkibda rotaciya ko'rishimiz mumkinmi?

- Bugun mening asosiy vazifam Afg'onistonni mag'lub etish edi. Bundan tashqari, ko'p o'yinchilar o'z klublarida o'ynashmayapti. SHu sababdan ham ularga o'yin amaliyoti berib, biroz tonusga keltirmoqchi edim. Kimdir bitta taym o'ynadi, kimdir ko'proq. Keyingi o'yinlarda ham albatta rotaciya bo'ladi. Biz bunday raqiblardan kuchliroqmiz. SHu sababdan ham rotaciya qilishga imkonimiz bor.